akunnattoorut

IA-meersup pissakinnerusunut killigititaq uisaaallaatigaa

Inuit ilaat illuminnut aserfallatsaaliinissamut 1.000 koruuninik amerlavallaartumik ukiumut isertitaqarsimanertik pissutigalugu, tapiissuteqarfigineqarnissaminnut itigartitaasimanerat, Peter Olsenip naapertuutinngitsutut isumaliuutigaa

Illuppit aserfallatsaalinissaanut tapiissutinik qinnuteqarnissat periarfissaavoq, kisianni isertitavit amerlassusaat qummut killeqarpoq. Killigititaq naapertuunnersoq Peter Olsenip IA-meersup eqqarsaatigaa

Tapiissutinik agguaanermi naapertuuttumik qanoq killiliisoqartarpa? Aalajangersimasumik killeqartinneqassava imaluunniit ataasiakkaat inissisimanerat apeqqutaatinneqartassava?

Taakku apeqqutit Inatsisartuni oqallisigineqaqqissagunarput. Pissakinnerusunut nammineq illoqartunut aserfallatsaaliinissamut tapiissutit iluamik aaqqissuussaanersut, IA-mit Inatsisartunut ilaasortap, Peter Olsenip eqqarsaatiginerata kingorna tamanna pivoq.

Killigititaq pingaartuunngitsoq imaluunniit naapertuuttumik agguaaneq
Maanna inuit ukiumut 180.000 koruuninit ikinnerusunik isertitaqartut illutik aserfallatsaalinissaanut tapiissutinik qinnuteqarnissaminnut periarfissaqarput. Taakku 150.00 koruunit tikillugit tapiiffigineqarsinnaapput.

Kisianni 180.000 koruunit sinnerlugit ukiumut isertitaqarsimagunik, qinnuteqaataat killigititamik qaangiisarpoq.

- Taamaakkaluartoq ulluni kingullerni saaffiginnittoqartalerpoq naammagittaalliortunik. Naammagittaalliornermut tunngaviulluni qinnuteqaraluarluni itigartinneqartarneq, Peter Olsen paragraf 37 naapertorlugu Naalakkersuisunut apeqquteqarnermini allappoq.

Itigartinneqartoq
Peter Olsen naapertorlugu, tassani inuit 181.000 aamma 183.000 koruuninik isertitaqarsimasut tassani pineqarput, taakkulu taamaattumik illuisa iluarsaanneqarnissaannut tapiissuteqarfigineqarnissaat itigartitsissutigineqarsimavoq.

- Paaserusuppara sooq taamaallaat 1.000 koruuniniit 3.000 koruuninut amerlavallaalaartunik ukiumut isertitaqarsimaneq itigartitsinissamut tunngaviussanersoq aammalu paaserusuppara tapiiffigineqassagaanni ukiumut annerpaamik 180.000 koruuninik isertitaqarsimanissamik piumasaqaat sumik tunngaveqarnersoq, Peter Olsen allappoq.

Powered by Labrador CMS