Angallanneq
IA-meersoq: Naalakkersuisoq nassuiaasariaqarpoq
Kelly Berthelsenip (IA) angallassinermut kiffartuussinermut isumaqatigiissutit nutaat Kujataanut nassuiaakkiartoqqullugit Knud Kristiansen kajumissaarpaa
Kujataamiuusugut angallannikkut sullinneqarnerput pitsaanngereersoq ajorseriassanersoq pitsanngoriassanersorluunniit tamatta, innuttaasut qinikkallu paaserusoqaarput.
Inatsisartunut ilaasortaq Kelly Berthelsen (IA) taama oqarpoq, taassuma ineqarnermut, sanaartornermut attaveqarnermullu naalakkersuisoq Knud Kristiansen (A) Kujataanut kiggartuussinermut isumaqatigiissutinik nassuiaassiartoqquaa.
Atuaruk: Disko Line: Aajuna ilaasunut aaqqiissutissarput
Apeqqutit akineqanngitsut
Isumaqatigiissutinut nutaanut tunngatillugu apeqqutit akineqanngitsorpassuusut Kelly Berthelsen isumaqarpoq.
- Ilaatigut naalakkersuisoq oqarpoq silaannakkut angalaneq periarfissaajuassasoq, saniatigulli Air Greenland sulisuminik soraarsitsiortorniarpoq. Taava ilaasussat tupinnanngitsumik paaserussavaat kikkunnik sullinneqassanerlutik. Air Greenlandip sulisui Kujataani sulinermut sungiussisimasut atornagit allaneersut sungiusaqqaartariaqqakkat sullississanerpat? IA-mi politikeri aperivoq.
Atuaruk: IA: Kiffartuussinissamut isumaqatigiissutini innuttaasut ilanngunneqarli
Nassuiaassinissamik piumasaqartoq
Kelly Berthelsenip saniatigut paaserusuppaa, Kujataani Air Greenlandimi sulisut ilumut soraarsinneqassanersut.
- Apeqquterpassuupput erseqqissumillu nassuiaasoqartariaqarpoq. Innuttaasut qinikkallu minnerpaamik piumasaat tassaavoq Naalakkersuisoq inunnut nassuiaajartussasoq, nalornisitsineq unitsinneqassasoq. Tatiginassusermik takutitsisoqartariaqalerpoq, Kelly Berthelsen oqarpoq.
Atuaruk: Akerliusut Knud Kristiansen oqaloqatigerusuppaat