Aalisarneq

IA-meersoq: Aalisarneq siammasissumik ingerlanneqarli

Qaleralinnut, saarullinnut suluppaakkanullu aalisagartassiissutit 10 procentii aalisaleqqaartunut aalisagartassiissuteqanngitsunut tunniunneqassappata, tamanna inuiaqatigiinnut pingaarnertut aalisarnermik inuussutissarsiuteqartunut siunissaq isigalugu pitsaalluinnassaaq, Hans Aronsen (IA) isumaqarpoq.

Qaleralinnut, saarullinnut suluppaakkanullu aalisagartassiissutit 10 procentii aalisaleqqaartunut aalisagartassiissuteqanngitsunut tunniunneqassappata, tamanna inuiaqatigiinnut pingaarnertut aalisarnermik inuussutissarsiuteqartunut siunissaq isigalugu pitsaalluinnassaaq, Hans Aronsen (IA) isumaqarpoq.

Avataasiortunut alisagartassiissuutit agguaanneqaqqammerput. Hans Enoksenip (PAN) nutaanik misileraanera Sulisitsisuniit assut eqqumiigineqarpoq.

Nutaanik aalisarnermut inuussutissarsiuuteqalerumasunik peqartoq takussutissaqartoq Hans Enoksenimit nalilersorneqarpoq. Taamaammat qalerallit, saarulliit suluppaakkanullu pisassat 10 procentii illikartinneqarput kingornatigut suliffeqarfinnit inuinnarnilluunniit aalisagartassaqanngitsunut qinnutigineqarsinnaanngorumaarlutik.

Sulisitsisuni pisortaq Brian Buus Petersen tamatumunnga akerliuvoq.

- Nunaqavissut aalisariutaat amerlareertut taama aalajangerneq inuiaqatigiit annaasaqaatigissavaat. Aalisarnermi inuussutissarsiuteqartut amerliallannerisa amerlavallaanik aalisartoqalerpat inuiaqatigiit annaasaqaatigissammassuk, Brian Buus Pedersen ilaatigut oqarpoq, aalisartunik iluamik aalisartitsinnginneq inuiaqatigiit annaasaqaatigissagaat taanna isumaqarpoq.

Atuaruk: Enoksenip aalisagartassiissuutit 10 procentii toqqorpai

Alloriarneq pitsaalluinnartoq
Kisianni maanna Inatsisartunut ilaasortap, IA-meersup Hans Aronsenip, Hans Enoksenip aalajangernera taperserpaa.

- Qaleralinnut, saarullinnut suluppaakkanullu aalisagartassiissutit 10 procentii aalisaleqqaartunut aalisagartassiissuteqanngitsunut tunniunneqassappata, tamanna inuiaqatigiinnut pingaarnertut aalisarnermik inuussutissarsiuteqartunut siunissaq isigalugu pitsaalluinnassaaq, taanna tusagassiuutinut nalunaarummi oqarpoq.

Hans Aronsenip taamaammat pilersaarummut Sulisitsisuniit ernumassutaasoq paasiuminaatsippaa.

- Ilisimavarput Kalaallit nunaqartugut imartatigut sineriattoorsuarmik, tamakkiinerusumillu ilisimanngisatsinni naak naatsorsuutigisinnaallutigu sineriassuaq avataalu aalisagaqarluartut siunissami pingaartitatut isumalluutigilluakkatsinnik. Aalisagaqassutsikkullu suli aarlerinartorsiorfiunngitsugut, Inatsisartunut ilaasortaq erseqqissaavoq.

Aalisartut inuusunnerit
Hans Aronsen naapertorlugu sinerissap qanittuani aalisartut utoqqaliartorput, inuusuttullu aalisartut periarfissinneqartariaqarnerarpai.

- 1900-kut naangajalersut aalisarnermik aaqqissuuseqqinnersuaq eqiterineq kalaallinit aalisartunit amerlasuunit neriulluaataasimasoq qatangiinnarsimavoq, Hans Aronsen oqarpoq, nangillunilu:

- Taamaattumik inuiaqatigiinnut siammaalluni aalisartitsineq pisariaqaleraluttuinnarpoq, politikkikkullu aporaassutaanani suleqatigiissutigigaanni pitsaasumik ingerlanneqarsinnaalluni.

Powered by Labrador CMS