IA: Marlunnik qinigaaffeqartarnermut oqariartuutertup Martha Lund Olsenimut tunngassuteqanngilaq

Sermitsiaq.AG-iip allaaserisimasaa partiip marlunnik qinigaaffeqartarneq pillugu aalajagernera paatsoorneqarsimasoq, IA-p siulittaasuata, Sara Olsvigip nuannarinngilaa.

'Martha Lund Olsen Inatsisartunit tunuarnissaminut piareersimasoq' allaaserisaq attuumassuteqarfiginagu, tusagassiuutinut nalunaarutigaa.

- Inuit Ataqatigiit borgmesterit piffissamik tamakkiisumik innuttaasunik sullissinermut atuinissaannik piumasaqarnitsinnik nalunaaruteqarnerput partiit allat qineqqusaartitaannut tunngasuusoq Sermitsiaq.AG eqqoriaavoq, Sara Olsvig (IA) allappoq.

Kommunini tamani borgmesteriunisaminnut piukkunnarluinnartunik sassartitaqarpugut

IA-p sapaatip akunnerata ingerlalaarnerani partiip borgmesteriutitai marlunnik qinigaaffeqassanngitsut nalunaarutigaat. Nalunaaruteqarnerlu ima paasillugu allaaserineqarluni:

'Illoqarfiit pingaarnersaanni kommunimut qinersinissamut pissanganartumut oqariartuuteqarneq tunngasoq qularnanngilaq, tassani Martha Lund Olsen Siumumit qinigassanngortippoq.'

Tamannalu Sara Olsvigip ilumuunnginnerarpaa.

- Marlunngorpat qinersinerit allat sisamat Kommuneqarfik Sermersuup avataani aamma pisussaapput, kommunissanilu taakkunani Inuit Ataqatigiit borgmesteriutitassaqqissunik sassartitaqarpugut. Tamanna Sermitsiaq.AG-mut eqqaatitsissutigiumavarput. Nalunaartueqarnerlu illoqarfiit pingaarnersaannut attuumassuteqanngitsoq naqissuserlugu.

- Inuit Ataqatigiit borgmesterit borgmesteriunerminnik ingerlatsinerat sukumiisumik eqqartorsimavarput. Qinigaaffinni qaangiuttuni kommunit ilaanni innuttaasut borgmesterertik maqaasisarsimaqaat, borgmesteriusut kommuniminni angalavallaannginnerat peqqutigalugu. Borgmestereqarsimavoq saniatigut suliffeqarfimminnik ingerlatsisimasut 100 %-millu innuttaasunik sullissinissamut piffissaminnik atuisimanngitsut, Sara Olsvig nangippoq.

Avannaani Kujataanilu Siumup borgmesteriutitai isornartorsiorai

Tassunga tunngatillugu Qaasuitsup Kommuniani borgmesteritut tunuartussaq Ole Dorph (S), aammalu Jørgen Wæver Johansen (S).

- Assersuutigalugu Qaasuitsup Kommuniani maannakkut borgmesteriusup tamanna naammassisimanngikkaa isumaqarpugut. Kommunimimi takussaanngipallaarlunilu ataatsimoortitsinngitsoorsimavoq. Kommune Kujallermi aamma borgmestereqarsimavoq kommunip ingerlatsiviani, ingammik isumaginninnerup tungaatigut, ingerlanerliortoqaraluartoq borgmesteriunermut piffissani nammineq suliffeqarfimminik ingerlatsinissamut piffissamik atuisimasumik, Sara Olsvig (IA) nangilluni allappoq.

- Inuit Ataqatigiit kommunini tamani borgmesteriunisaminnut piukkunnarluinnartunik sassartitaqarpugut. Borgmesteriutitaqalerutta, aamma Kommuneqarfik Sermersuup avataani, borgmesteriunerup tamakkiisumik aallunneqarnissaa Inuit Ataqatigiit borgmesteriutitassatsinnut tamanut atuuppoq, tusagassiuutinut nalunaarut taama naggaserpaa.

Kommuneqarfinni sisamani Siumup pissaanermik tigummiaanik arsaarneqassapput IA siuaateqarujussuartariaqassaaq Siumullu kinguaariaateqarujussuartariaqarluni.

Assersuutigiinnarlugu 2013-imi qinersisoqarnerani Aasiaanni, IA-qarfissuarmi, Qaasuitsup Kommuniani Siumut ajugaarujussuarpoq.