naligiinneq
IA: Kommunit nutaat assigiinngissuseq annertusitippaa
Inatsisartut upernaakkut ataatsimiinnissaanut partiip siunnersuutigaa, naligiinnerulernissaq pillugu Naalakkersuisut kommuninik suleqassasut
Inatsisartut ukiakkut ataatsimiinnissaannut naligiinnerulernissaq Inuit Ataqatigiit ukkatariniarpaat.
Tassungalu atatillugu partiip tikkuartorpaa, 2009-imi kommunit aaqqissuuteqqinneqarnerat, kommunit 18-init sisamanut kattunneqarnerat naligiinnerulernermik kinguneqartitsinngitsoq. Illuatungaanilli naligiissaarinissaq annertuneruliinnarsimavoq.
Ataatsimut akisussaaffik
- Nuna tamakkerlugu naligiinnerulernissamut suliaq tamatsinnit akisussaaffigineqarpoq. Inuit Ataqatigiit Inatsisartuni upernaami ataatsimiinnermi kommunet sisamat akornanni naligiinnerulernissamik suliaqartitsinissamik Naalakkersuisut peqquneqarnissaannik aalajangiiffissatut siunnersuummik saqqummiussissaagut. Siunnersuut aningaasanik nussuinerup saniatigut allatigut naligiinnerulernissamik angusaqarsinnaanermut iliuuseqarnissamik pisariaqartitsinermik tikkuussissaaq, IA-mi siulittaasoq Sara Olsvig, tusagassiuutinut nalunaarummi taama oqarpoq.
Matumani politikkikkut ataqatigiissaarisumik ataatsimiititaliortoqassasoq pimoorussilluni 'sulianik ataqatigiissaarinnissinnaasoq' partiip siunnersuutiginiarpaa, kommunillu tamaasa peqataatillugit suliamik ingerlatsisinnaasoq.
Aamma kommunit iluanni
Partiip illuatungiliuttup aamma pingaarnerarlugu tikkuarpaa, kommunit akornanni naligiissaarisoqartariaqartoq assigiinnerulersitsilluni, aammalu kommunit iluanni assigiinnginneq iliuuseqarfigineqartariaqartoq, minnerunngitsumillu najugaqarfinnit minnerusunit amerlasuut illoqarfinnut anginersusunut nuttarnerat pissutaanera.
Atuaruk: Kujalleq aningaasaqarnikkut siuariartorpoq