Aasiaat
IA-kkormiu pitsaanerusumik asfalterinissamik piumasaqarpoq
Aasianni aqquserngup 1 kilometerip asfaltiterneqarnera sullugineqarpoq
Qaasuitsup Kommuniani aqquserngit asfaltitertarneranni allaanerusumik periuseqarnissaq Inuit Ataqatigiit sinnerlugit kommunalbestyrelsemi ilaasortap Peter Olsenip siunnersuutigaa. Siunnersuut kommunalbestyrelsemut tunniuppaa Aasianni aqqusineq 1 kilometeri asfaltiterneqareersoq.
Qaasuitsup Kommuniani aningaasaliissutit tunngavigalugit Aasianni aqquserngit qanoq annertutigisumik asfaltiterneqassanersut aalajangersorneqarpoq. Aasianni aqquserngit suli amerlanerusut asfaltiterneqarnissamik pisariaqartitsigaluarput taakkuli kingusinnerusumut utaqqinneqartariaqassapput.
Misilittakkat ajorput
Maanna Peter Olsen siunnersuuteqarpoq illoqarfimmi asfaltigassatut pisariaqartitsineq naammassineqaraangat aatsaat illoqarfimmi allami asfalterineq ingerlanneqartassasoq.
- Misilittagaalersut massakkut pitsaanngitsut ilinniarfigalugit suleriaaseq pitsaanerusariaqarpoq. Pisariaqartitat naammasseqqaartariaqarput. Kissaatigaagalu illoqarfiit anginerusut aallartiffiussasut siullermik Ilulissat qanittuaniittut, Aasiaat, Qasigianguit aammalu Qeqertarsuaq. Aasiaat siulliullugu, Peter Olsen siunnersuummini allappoq.
Qaasuitsup Kommuniani asfaltiliuut Ilulissaniippoq. Taamaammat ujaraaqqat illoqarfimmi asfaltigassamit Ilulissanut ingerlateqqaarneqartarput tassanilu asfaltimik akoorneqareeraangata utertinneqartarlutik.