Svend Hardenbergip mailernera
IA Kim Kielsenip mailikkut naqqeeqqusineranut tunngasumut: Suut tamaasa saqqummiutikkit
Naalakkersuisuni siulittaasup ataqqinasutsini atorlugu suut tamaasa saqqummiuttariaqarpai iliuusinilu toqqortorniarsaralugit, Inuit Ataqatigiiinnit oqaatigineqarpoq
Naalakkersuisut siulittaasuata Naalakkersuisoqarfiani pisortap Svend Hardenbergip Naalakkersuisut siulittaasuannik Kim Kielsenimik Siumumeersumik isumaqateqareernermi kingorna Folketingimut ilaasortaasimalersumut Nick Nielsenimut Siumumeersumut oqaatigisimasaanik naqqeeqqussummik mailimik nassiussinera pillugu Siumup siulittaasua Naalakkersuisullu siulittaasuat tallimanngormat nassuiaateqarpoq.
Pituffimmi kiffartuussinissamut isumaqatigiissutip annaaneqarnera pillugu Folketingimi oqallinnermi januaarip 21-ani pisumi Nick Nielsenip oqaatigisai naqqeqqullugit Svend Hardenberg mailimik nassiussivoq. Pisoq sivitsunngitsoq qaangiutiinnartoq Siumup aqutsisoqarfianit Nick Nielsen folketingimi ilaasortaajunnaarsinneqarpoq.
Kalaallit Nunaanni atorfilittatut qaffasinnerpaamik inissisimasup qinikkap naqqiissuteqarnissaanut sooq piumasaqarsimanersoq Kim Kielsen tallimanngormat aperineqarami ima akissuteqarpoq:
- Taamaasiunngilaq. Mailimik nassiussissasoq piumaffigaara. Annertuuliuutissaanngilaq. Aamma pisoq pillugu isertugassaqarnanga naqissuserusuppara, Naalakkersuisut siulittaasuat.
IA: Atorfiit assigiinngitsut akulerusuullugit paatsiveerunnerujussuaq
Kim Kielsenip nassuiaataa Inuit Ataqatigiinnit isumaqatigineqanngilaq.
- Naalakkersuisup siulittaasuata nassuiaanerata pisoq pitsaanerulersinngikkaa Inuit Ataqatigiinni isumaqarpugut. Akerlianilli. Naalakkersuisunit qinikkat sumi qinigaagaluartunilluunniit piumasaqarsinnaanngillat, apeqqutaatinnagu partiimit suminngaaneersuugaluarpata imaluunniit sumi qinigaagaluarpata, Inuit Ataqatigiit gruppianni siulittaasoq Agathe Fontain tusagassiuutinut nalunaarummi allappoq. Kim Kielsenip Siumumi siulittaasutut Nick Nielsenip oqaaseqaatiminik tunuartitseqqullugu toqqammavissaqarluaruni piumaffigisinnaagaa oqarpoq.
- Kisianni Kim Kielseni Naalakkersuisuni siulittaasutut qinigaq naalakkersinnaanngilaa, ingammik Namminersorlutik Oqartussat atorfilittaat aqqutigalugu. Atorfiit assigiinngitsut akulerusuullugit paatsiveerunnerujussuuvoq.
Naalakkersuisuni siulittaasup Kim Kielsenip 'ataqqinasutsini atorlugu suut tamaasa saqqummiuttariaqarai iliuusinilu toqqortorniarsarinagit' IA-mit oqarput.
- Naalakkersuisut siulittaasuat qinnuigissavarput, eqqaamaqqullugu Naalakkersuisuni siulittaasutut qinikkanut naalagaanngimmat, taamaallaat Naalakkersuisunut naalagaammat. Partiimini siulittaasutut sulerineri akuleruffigissanngilarput, kisiannili Naalakkersuisut siulittaasuattut atorfilittani piumasaqarfigisinnaanngilai partiimi iluani suliaqaqqullugit. Taamaattuminguna partiit ataasiakkaat tamarmik allattoqarfeqartut, Agathe Fontain oqarpoq.
Hardenbergip nassuiaassuteqarnissaa
Mailimi nassiunneqarsimasumi oqallisigineqartumi Svend Hardenbergip inuttut nammineq mailiminit Nick Nielseniut maili nassiuppaa. Mailimi allaqqanngilaq Kim Kielsen naqqiisoqarnissaanik piumasaqarsimasoq.
Kisianni mailip nassiunneqareernerani Kim Kielsenip naqqiisoqarnissaanik piumasaqarsimanera ilanngunneqarsimasinnaavoq.
Naalakkersuisut siulittaasuata Naalakkersuisoqarfiani pisortap Svend Hardenbergip sooq nammineq mailiminit kukkusoqarneranik naqqiisoqarnissaanik piumasaqaatini mailiminit nassiussimaneraa nassuiaateqartinniarlugu Sermitsiaq.AG suli utaqqivoq. Soormita nammineq mailiminit - atorfimmi mailiatiguunngitsoq - piumasaqaatini nassiuppaa?
AG-mi allaaserineqartut 'IA-p atorfilittat politikerimut peqqusinerat tupigusuutigaa' aamma 'Nick Nielsen: Naalakkersuisut siulittaasuat Kim Kielsen kisermaassiniarpoq' aviisimi atuarneqarsinnaavoq. Aviisi uani pisiarineqarsinnaavoq: