IA Kim Kielsenimut: Peqqissutsimut naalakkersuisumik ivertitsigit

Inuit Ataqatigiit Naalakkersuisut siulittaasuat, Siumumeersoq Kim Kielsen, aammaarlutik kaammattorpaat peqqissutsimut naalakkersuisumik nutaamik ivertitsinissaanut, Doris Jakobsenip Naalakkersuisunit Folketingimut qinersisoqarnissaata tungaanut sulinngiffeqarnerani.

Inuit Ataqatigiimmi Inatsisartuni ilaqutariinnermut peqqissutsimullu ataatsimiisitaliaq peqatigalugu peqqissutsimut naalakkersuisuungallartoq, Siumumeersoq Martha Lund Olsen ataatsimeeqatiginiartarsimagaluarpaat, iluatsinngittumilli.

- Inuit Ataqatigiit matumuuna apeqquseqqikkusupparput, ilumut naalakkersuisoqarfik taama angitigisoq naalakkersuisuni allanit ingerlanneqarnissaa pissusissamisoornersoq, Inuit Ataqatigiinnersut Juliane Henningsen aamma Aaja Chemnitz Larsen, taama uparuaapput.

Atuaruk: Naalakkersuisuni paarlaattoqarnera IA-mit isornartorsiorneqarpoq

Maanna aaqqiineq atorsinnaannginnerarpaat
Inuit Ataqatigiimmi isumaqarput peqqissutsimut naalakkersuisoqarallartitsilluni aaqqiissuteqarneq atorsinnaanngitsoq, peqqissutsimut tunngasuni akisussaaffiit annertummata.

- Taamaattumik Kim Kielsen, kiisalu partiit Naalakkersuisuutitaqartuusut kaammattorusuppagut Naalakkersuisoqarfik innuttaasunut pingaaruteqaqisoq pitsaanerpaamik ingerlanneqaqqullugu nutaamik Naalakkersuisumik piaartumik toqqaaqqullugu, Juliane Henningsen aamma Aaja Chemnitz Larsen taama tusagassiuutinut nalunaaruteqarlutik allapput.

Peqqissutsimut naalakkersuisumik nutaamik ivertitsisoqarnissaa Nuummi Inuit Ataqatigiinnit aamma piumasarineqarpoq.

Siumumeersoq Doris Jakobsen, decembarip aqqaneq aappaani 2014-imi peqqissutsimut nunanillu avannarlernik suleqateqarnermut naalakkersuisutut ivertinneqartoq, Folketingimut qinersisoqarnissaata tungaanut Folketingimi ilaasortanngoqqinniarluni Naalakkersuisunit sulinngiffeqarniarluni qinnuteqarami februaarip qulinganit sulinngiffeqalernera akuerineqarpoq. Folketingimi qinersisoqaqqinnissaata tungaanut ilaasortaassaaq, kingusinnerpaamik septembarip 14-ani qinersisoqassaaq.

Atuaruk: Doris Jakobsen Naalakkersuisunit sulinngiffeqalerpoq

IA: Peqqinnissaqarfik tunulliunneqarpoq
Tamatuma kingorna Doris Jakobsenip peqqinnissaqarfimmut akisussaaffiit tigummiai ilaqutariinnermut, nalingiisitaanermut isumaginninnermullu naalakkersuisumut, Siumumeersumut Martha Lund Olsenimut tunniukkallarneqarput.

- Ilaqutariinnermut peqqissutsimullu ataatsimiititaliamit peqqissutsimut naalakkersuisuugallartoq peqqinnissamut tunngasunik arlaleriarluta oqaloqatiginiartarsimagaluarparput. Taannali piffissaqartarsimanngilaq, isumaginninnermut tunngasut suliat siulliunneqartarmata taamaalillunilu peqqinnissaqarfimmut tunngassuteqartut tunulliunneqartalernerat takussutissaqarluarpoq, Juliane Henningsen aamma Aaja Chemnitz Larsen taama marluullutik allapput.

Taakkua aamma allapput Martha Lund Olsenip tulleriissaarineri tapersersoritik.

- Tamanna sulianik pingaartitsineq tapersersorparput, oqartariaqarpugullu tunulliussisariaqartarneq takussutissaasoq ersarissoq. Suliassaqarfinnik marlunnik annertoorsuarnik ataatsikkut suliaqarniarneq ajornakusoormat, IA-kkormiut taakku marluk taama allapput.

Atuaruk: Meeqqat sumiginnakkat' pillugit suliniuteqarnermi politikkikkut suleqatigiinneq