arnat ulluat
IA-mit Juliane Henningsen: Politikkimi arnat amerlanerusut
Arnat ulluannut atatillugu politikkimi arnat amerlanerulernissaat Inuit Ataqatigiinnit kissaatigineqarpoq
Kalaallit Nunatsinni illoqarfinni nunaqarfinnilu arnat najugaqartut politikkimi akuulertariaqartut tusagassiuutinut nalunaarummi Inuit Ataqatigiinnit Inatsisartuni ilaasortaq Juliane Henningsen allappoq.
Arnat ulluat ullumi sapaammi nalliussineqarneranut atatillugu taamatut allappoq.
- Ullumikkut arnat angutillu naligiillutik qinigaatitaaffinnut assigiinngitsunut sassarnissaminnut periarfissaqaraluartut, suli qinigaatitat akornanni naligiinnginneq annertoqaaq, Juliane Henningsen oqarpoq.
- Immikkut maluginiarpara kommunalbestyrelsini ilaasortat taamaallaat 29,5 procentii arnaammata. Nunaqarfinni aqutsisut qiviaraanni ilaasortat akornanni arnat taamaallaat 22,8 procentiupput.
Nunaqarfiit
Ukiormanna nunaqarfinni arnanik politikkikkut soqutigisalinni pikkorissaanissaasoqarnissaa Juliane Henningsenip oqaatigaa.
- Ukiormanna Qeqertarsuatsiaani kiisalu Kulusummi pikkorissartitsinerit sulliviutigisut ingerlatissavagut. Siunertaavoq arnat sakkussaannik tuniorassallugit, oqaluuserisas-sanngortitsinerit, qineqqusaarnerit, ajornartorsiutinut aaqqiissutissanik ujartuineq kiisalu piffinni taakkunani ajornartorsiutaasinnaasut eqqartorneqassapput. Neriuutigaarput taamaaliornikkut arnat amerlanerusut qinersinissanut tullernut sassarumaartut taamatullu qinikkat amerlisinnaajumaartut, IA tunuliaqutaralugu politikkeri oqarpoq.
Suliamut tunngatillugu oqaatigineqarpoq Juliane Henningsen Internation Indigenous Women’s Forum-imi peqataasussatut toqqarneqarsimammat. Inuit pisinnaatitaaffiinut tunngasuni nunarsuarlu tamakkerlugu arnat siuttuusut pikkorissartinneqarnerannut peqataasussatut.