IA-mit Johan Lund Olsen Folketingimut qinigassanngortissaaq

- Aap, folketingimut qinigassanngortissaanga. Tamanna ukiortaaqqammersoq aalajangiuppara.

Inuit Ataqatigiinnit folketingimi ilaasortaagallartoq Johan Lund Olsen Sermitsiaq.AG-mut oqarpoq.

- Folketingimi sulissutigisakka ingerlateqqinniarpakka. Soorlu Pituffimmut puisip amialu pillugu sulissutigisakka, Johan Lund Olsen oqarpoq.

Kalaallit Nunaata nunanut allanut kiisalu illersornissakkut oqartussaassuseqarnerulernissaa aamma sulissutiginiarpaa.

Nunanut allanut tunngasut illersornissarlu
- Kalaallit Nunaata nunanut allanut tunngasunut illersornissakkullu pisinnaatitaaffii annertusarniarpakka. Danmarkip oqaluukkuminaannerujusuua Pituffimmut suliamut tunngatillugu takusinnaavarput, 57-nik ukiulik Johan Lund Olsen oqarpoq.

- Suliani assingusuni Kalaallit Nunaat peqataatinneqarnerusalissaaq. Tamanna sulissutigissavara Folketingimut qinigaassagaluaruma, Inuit Ataqatigiit tunuliaqutaralugit politikkeri oqarpoq. Taanna Folketingimi Inatsisartunilu politikkeriusareerpoq.

- Danmarkimut nunasisunut aningaasat amerlanerusut atorneqartariaqarput. Kalaallit Danmarkimiittut pitsaanerusumik atugassaqartinneqartariaqarput, Johan Lund Olsen oqarpoq.

Statsministeri Helle Thorning-Schmidt qinersisoqarnissaa suaarutigeriarpagu Inuit Ataqatigiinnit kikkut qinigassanngortinneqassanersut tusarliunneqarumaartoq Johan Lund Olsenip oqaatigaa.

Danmarkimi angalasoq
Johan Lund Olsen Danmarkimi illoqarfinni assigiinngitsuneereerluni Københavnimut uteqqammerpoq. Odensemut Vejlemullu sisamanngormat tikeraarpoq. Aamma Aarhus Aalborgilu tallimanngormat tikippai.

- Ulluinnarni suleqatigisartakkatta ilarparujussuisa naapinneri nuannerluinnarpoq. Kalaallit Illuutaanni pisortaasut naapinneri nuannaarutigaara, aamma inunnik sullissisut naapippakka kiisalu ilinniartunik siunnersuisartut aamma naapillugit. Vejlemi innuttaasut aamma naapippakka, tamannalu nuaannrutigaara, Johan Lund Olsen oqarpoq.

Steenholdt pakatsisoq
Taamaakkaluartoq innuttaasoq ataaseq pakatsivoq. Folketingimi Atassut tunuliaqutaralugu siornatigut ilaasortaasoq Otto Steenholdt Aalborgip eqqaani najugaqartuuvoq Aalborgimilu Kalaallit Illuutaanniittarluni.

- Politikkikkut soqutigisaqartuulluni pakatsisitaaneq, ataatsimiiffiullu matoqqasup silataani, iseqqusaanani,angerlaannartariaqarsimaneq massa tusarnaariaraluarneq piffissaajaatigisimagaluarlugu, mamiatsannaqaaq, Otto Steenholdt aaqqissuisoqarfimmut allappoq.

Steenholdtip isornartorsiuinera akissuteqarfigaa
Johan Lund Olsenip Otto Steenholdtimit isornartorsiorneqarnini oqaaseqarfigaa:

- Otto Steenholdtip naapikkusussimammanga nuannaarutigaara. IA-p illoqarfinni assigiinngitsuni angalasarneri pingaaruteqarnerisa takutippaat.

- Kisianni Vejlemi, Odensemi, Aarhusimi Aalborgimilu angalaninni ammasumik ataatsimiisitsinissat pilersaarutaanngillat. Kalaallit Illuutaanni atorfeqartunik ataatsimeeqateqarpunga, ornittakkallu aamma tikillugit. Københavnimi kisimi ammasumik ataatsimiisitsinissaq pilersaarutigineqarpoq. Angalaninni ataatsimeeqatigiinnissat 2013-misut ingerlanneqartut piffissaqarfiginngilakka. Kisianni tamanna uterfigineqaqqikkumaarpoq.