pillaatissamik atuineq
IA: Isikkakkut kalunnerit nunatsinni atorneqalissapput
IA tunuliaqutaralugu Folketingimut ilaasortaq Aaja Chemnitz Larsen inatsiseqarnikkut, arlalitsigut kinguaattoorfiusimasumi ilaatigut eqqartuussisunik illersuisunillu ilinniagaqartitsinermik, pingasunngormat politikkikkut annertuunik saqqummiussivoq
Eqqartuussut angerlarsimaffimmi atorneqarsinnaassaaq isikkakkut paffikkulluunniit nakkutilliissut elektroniskiusoq atorlugu, isertitsivimmi pillaammik atuinissamut taarsiullugu. Taamatut IA politikkikkut suliniutissat annertunerusut ilaattut Folketingimi saqqummiussivoq, pingasunngormat Kalaallit Nunaanni inatsiseqarneq pillugu tusarniaanermi Folketingimut ilaasortap Aaja Chemnitz Larsenip saqqummiussaanik.
– Danmarkimi isikkakkut kalunnerit piffissangaatsiami atorneqareersimapput misilittagaqarfiullutillu. Assersuutigalugu inatsisinik unioqqutitsisimagaanni suliassallu sivisuumik suliarineqarnera pissutigalugu ukioq ataaseq marlulluunniit aatsaat qaangiutereersut eqqartuussivimmi suliarineqalerpat, tamatumalu tungaanut inuuneq ilorraap tungaanut aallarteqqissimallugu, ajorluinnarpoq qaammat ataaseq marlulluunniit isertitsivimmiittariaqarnissaq. Tamatumunnga taarsiullugu isikkakkut kalunnerit atorneqarsinnaapput, tamatumuunakkut qulakkeerneqarsinnaammat innuttaasunut pitsaanerusumik akuulersitaaqqinnissaq, IA tunuliaqutaralugu folketingimut ilaasortaq oqarpoq.
Sermitsiaq.AG-p ullumi tusarniaaneq malinnaaffigissavaa.
Isikkakkut kalunnerit pillugit AG-mi paasisaqarnerugit: