IA innuttaasunik ataatsimiititsinermi: Qallunaat naalakkersuisuisa paasissutissinneq ajorpaatigut

Ilisimaneqartutut ilisimasaqarneq pissaaneqartitsivoq, tamannalu nunanut allanut tunngasunut illersornissamullu politikkimi atuulluinnarpoq.

Akisussaaffeqarfiit marluk Danmarkip tigummigaluarai IA-mut pakatsinarpoq sammisat taakkua marluk Folketingip tosuusarsuini oqaluuserineqaraangata mattussaasimalluinnartutut misigisimasarneq.

Annertunerusumik sunniuteqarusupput

– Paasissutissinneqarneq ajorpugut. Tamakkua Sermitsiami atuartarpavut, Aaja Chemnitz Larsen pingasunngormat unnukkut IA-p Nuummi innuttaasunik ataatsimiititsinerani oqarpoq.

Tassani folketingip politikkia oqaluuserineqarpoq.

Aaja Chemnitz Larsen itisilerivoq:

– Illersornissamut nunanullu allanut tunngasunut politikkimi sunniuteqalaarusukkaluarpugut, folketingimili politikeritut sorsuutigisassanit tamanit tamanna pakatsinarnerpaajungajappoq.

Politikerili IA-meersoq innuttaasunik ataatsimiititsinermi tassani oqarpoq Taksøe-p nalunaarusiaata pilersinneqarneranut atatillugu naalakkersuisunit tusaaniarneqarsimallutik. Ajornartorsiutaavoq ulluinnarni suleriaatsip ingerlarnga, partiip siulittaasua Sara Olsvig (IA) innuttaasunik ataatsimiititsinermi itisiliivoq.

Uagut aperinata

Tamatumunnga assersuutissaavoq qanittukkut Aaja Chemnitz Larsenip naalakkersuisut aperisimammagit Issittumit folketingimut ilaasortatut John Kerry ataatsimeeqatigisinnaanerini, taassuma Danmarkimut Kalaallillu Nunaannut tikeraarneranut atatillugu.

Tamatumani paasitinneqarpoq ataatsimiinnerit tamarmik ´naalakkersuisuniit naalakkersuisunut´ aqqissuunneqassasut, taannalu folketingimut ilaasortaagaluarluni tassa Naalakkersuisut aperissagai Kerry naapissinnaanerlugu.

Maannakkorpiaq IA Kujataani ataatsimeersuarpoq, tamannalu peqatigalugu partii urani pillugu arlalinnik aaqqissuussaqarniarpoq.