IA illuatungiliuttunngulersoq
Siumup Inuit Ataqatigiinnik isumaqatiginninniarnini tamaatippai. Tamanna Sara Olsvigip nalunaarutigeqqammerpaa
Ualeq manna nal. 16:00 Inuit Ataqatigiit siulittaasuat Sara Olsvig tusagassiortunut utaqqisunut anillappoq isumaqatigiinniarnerni killiffimmik ilisimatitsiniarluni.
- Ataatsimiinnitsinni kingullermi maanna peqqammertumi Siumup ilisimatippaatigut aalisarneq pillugu isumaqatigiinniarnigut tassunga killittut, misigisimagaluarpugut suliassaqarfik taanna pillugu oqaloqatigiilluarluta aammalu naapiffissaqarluarluta, Sara Olsvig partiit torsuusaanni tusagassiortunut nalunaaruteqarpoq.
Ippassaq unnulluinnartoq IA-p isumaqatigiinniarnerni piumasaqaatitik tusagassiuutit aqqutigalugit saqqummiuppaat, tassanilu aalisarnermut inatsisip ilusilersorneqarnissaanik IA-p kissaatai malillugit ingerlatsisoqassasoq piumasaqaatit akornanni pingaarnerpaanut ilaatinneqarpoq, Sara Olsvig aperaarput taamaaliornerat isumaqatigiinniarnernik innarliisimasinnaanersoq, taannali Siumup siulittaasuata Kim Kielsen-ip akissutissaqartissagaa Sara Olsvig akivoq, taamaattorli erseqqissaavoq isumaqatigiinniarnerit ingerlateqqinneqarnissaannut IA-p matua suli ammasoq.
- Matorput suli ammavoq, Sara Olsvig oqarpoq.
Siumup Siulittaasua Kim Kielsen oqaaseqartinniarlugu attaviginiaraluaratsigu iluatsinngilarput