pilersaarusiaq

IA: Illoqarfiit pingaarnersaanni pilersaarut kommunit sinnerinut pisussaaffiliivoq

Illoqarfiit pingaarnersaannut pilersaarusiaq Inuit Ataqatigiit aningaasaqarnermut oqaaseqartartuannit, Bendt B. Kristiansenimit taperserneqarpoq, kommuninut sinnerinut pisussaaffiliisoq taanna isumaqarpoq.

Bendt B. Kristiansenip Inuit Ataqatigiinni aningaasaqarnermut oqaaseqartartup Nuup ineriartortinneqarnissaanut pilersaarutit taperserpai.

Eqiterukkaluttuinnarneq (illoqarfinnut inuit nuttarnerat) akortuinnaanngitsoq ''Sermersuup pilersaarutaa kommuninut allanut maligassiuivoq'' qulequtsiullugu Inatsisartunut ilaasortaq allappoq.

- Illoqarfiit ineriartorfiusut nunamut tamarmut aningaasaqarnikkut siuariartornermik pilersitsisarput. Puigussanngilarputtaaq inuk ineriartortuartuummat periarfissanillu ujaasiuartuummat, taamaattumik illoqarfiit ineriartornermik pilersaaruteqarfiullutillu ineriartorfiusut eqiteruffigineqarnerat ersarittarpoq, tassanilu nunatsinni Nuuk ersarissumik assersuutissaavoq, ilinniarfeqarluarnikkut, sunngiffimmi sammisassaqartitsilluarnikkut ataatsimoorfiusinnaasunillu allanik periarfissaqartitsilluarnikkut, soorunami aamma suliffissat amerlanerusut piuneritigut, Bendt B. Kristiansen tusagassiuutinut nalunaarummi allappoq.

- Nunatsinni ukiut aggersut ineriartornissamut periarfissaqarluartut ornippagut, pingaartumik illoqarfinni timmisartoqarfinnik allileriffissatut takorloorneqartuni, assersuutitut Ilulissat Qaqortorlu, soorunami aamma kommunit sinnerini, taanna allappoq, nangillunilu:

- Sanaartornerup ingerlanerani suliffiit nutaat pilersinneqaannaratik mittarfiit atulernerisa kingorna suliffiit amerlanerusut pilersinneqarfigisinnaasaat, ilaatigut takornariaqarneq ineriartorteqqilluarneqarsinnaalluni. Taamaattumik kommunalbestyrelsit nutaassat annertuumik pisussaaffeqarput illoqarfiit pilersaarusiornerini siunissaq ungasittoq eqqarsaatigalugu inerisaanissaq pilersaarusiussallugu.

Powered by Labrador CMS