IA: Finn Lyngep Kalaallit Nunaat nunarsuarmi saqqumilaalersippaa

Tallimanngormat unnukkut politikeri, atuakkiortoq, nunarsuarmiu allarpassuarnillu sulialik Finn Lynge Qaqortumi angerlarsimaffimmini anerningerpoq. Sivisuumik napparsimareerluni 80-inik ukioqarluni toquvoq.
Tamatumunnga atatillugu Inuit Ataqatigiit imatut eqqaaniaapput:
´Inuit Ataqatigiinni aliasuutigeqisatsinnik tusarparput Finn Lynge toqukkut qimagussimasoq.
Finni politikeritut, eqqarsartartutut, atuakkiortutut inuttullu immikkullarissumik namminiussuseqartuuvoq. Peqatigalugu apeqqutinik itisuunik artornartunillu eqqartueqatigiinnissanut arlalissuuvugut periarfissaqartarsimasut, paasisimasaqarluassusia inuppalaajussusialu pillugit aamma nersusaraarput. Imartuunik atuakkiortarnermigut kalaallit atuakkiaataannut tunisisarsimavoq naggatissaalu tikillugu inuit ikittunnguaannaat assigalugit kajumeqaluni uummateqaqalunilu inuiaqatigiit oqallinneranni peqataalluni.
Oqaloqatigiinnissinnaassuseqarnera aammalu Issittup Kalaallillu Nunaata ukkatarilersinneqarnissaannik kissaataa pissutigalugit suliniaqatigiiffippassuaqarpoq nunatsinnukartartunik. Piffissaagallartillugu Kalaallit Nunaat nunarsuup assingani saqqumilaalersippaa.
Avatangiisitsinnut illersuisuunera, silap pissusiata allanngoriartornerata nunat tamat akornanni akiorniarneqarnera aammalu piujuaannartitsineq ersoqatigiinnerlu eqqaamaneqaatigisassai pillugit Finni puigunngisaannassavarput.
Inuiaqatigiinnut kalaallinut, nunatsinnut inuiassuarnullu tunniussimasai tamaasa pillugit qujaffigerusupparput.
Ilaqutai qanigisaalu angingaartumik misiginneqatigivagut.
Finn Lyngep eqqaaneqarnera ataqqinartuuli.´