IA danskit naalakkersuisuinut: Suleriaaserineqartoq akuersaarneqarsinnaanngilaq

- Danskit naalakkersuisuisa saaffiginnissut oqippallaartumik tigusimappassuk qisuarianngittoorlutillu akuersaarneqarsinnaanngilaq.

Inuit Ataqatigiinni siulittaasoq, kiisalu Inatsisartuni Nunanut allanut sillimaniarnermullu ataatsimiititaliaanut ilaasortaq Sara Olsvig oqarpoq. Pituffimmi kiffartuussinissamut isumaqatigiissut pillugu oqarpoq.

- Nunanut allanut ministeriaqarfiup Naalakkersuisut akuerisaannik EU-llu malittarisassai pillugit paasissutissat qulaajarneqarsimatinnagit 2013-mi decembarimi allagartaliinis-samut akisussaaffik amerikarmiunut tunniuppaat. Maanna erserpoq (Finans aaamma JyllandsPostenip allaaserinninneratigut) Nunanut allanut ministeriaqarfiup 2014-mi aasakkut USA-mit saaffiginnissummut allagartaliinermut Nunatsinnut pingaaruteqarluinnartumut tunngasumut qisuariaaateqarsimarpasinngittut, Sara Olsvig oqarpoq.

Misissuisoqarnissaa IA-mit suli piumasarineqarpoq
Inuit Ataqatigiit Nunanut allanut sillimaniarnermullu ataatsimiitialiamut ilaasortaatitaasa aappaata Aaja Chemnitz Larsenip oqaaserineqartut taperserpai.

- Inuit Ataqatigiinnit suliap sukumiisumik qulaajarneqarnissaanik piumasaqaaterput attapparput, tamannalu Nuummi Københavnimilu pisariaqarpoq. Namminersorlutik oqartussani Nunanullu allanut ministeriaqarfimmi kukkussutaasarsimasut maanna arlaqarpasilerput. Tamanna naammaginanngilluinnarpoq nunattalu karsianut akisuvallaarujussuarsimalluni.

Inuit Ataqatigiinnit oqarput suliaq kanngunartutut isigineqalerpoq.

- Kiisa suliaq una kanngunartutut taaqqajaalerpara. Maannamut takusavut Naalagaaffeqatigiinnit suliap sungiussisimarpalaanngitsumik suliarineqarsimaneranik takutitsipput, tamannalu akuersaarsinnaanngilarput. Naalakkersuisut danskillu naalak-kersuisui erseqqissumik nassuiaasariaqarput, Sara Olsvig oqarpoq.

Isumasioqatigiinnissaq suli ullulerneqanngilaq
Inuit Ataqatigiit Folketingimut ilaasortaatitaat Johan Lund Olsen danskit partiivi arlaqartut peqatigalugit danskit Ministeriunerat Nunanullu allanut ministeriat Folketingimi isumasiussallugit qaaqqoreerpai.

Isumasiuinissaq suli ullulerneqanngilaq, Ministeriunerullu maannamut suliamut akulerukkumasimanngittup peqataanissani suli nalunaarutiginngilaa.