namminersortunngorsaaneq

IA avannaani: IT-mik namminersortunngorsaaneq nunatsinni ajornartorsortitsilersinnaavoq

TelePost-ip namminersortunngorsarnerata kinguneranik IT-mi ineriartornermi nunarput marluinngorluni avissasoq ernumanaatilerujussuuvoq, Qaasuitsup Kommuniani IA tunuliaqutaralugu kommunalbestyrelsimi ilaasortaq oqarpoq

Qaasuitsup Kommuniata kommunalbestyrelsiani Inuit Ataqatigiit tunuliaqutaralugit ilaasortaq, Bendt B. Kristiansen. Assi toqqorsivimmit

Attaveqaatinik atuinermi namminersortunngorsaanissamut periarfissanik misissuineq ukiorpassuarni Tele-Postimit misissorneqartoq unitsinneqarallaqqavoq. Namminersortunngorsaaneq apriilip aallaqqaataanit atuutilersimasussaagaluarpoq.

Taamatut aalajangertoqarnera politikkerinit unammillertaasuniillu isornartorsiorneqartareerpoq.

Misissuinerulli unitsinneqarallarnera Ilulissani Inuit Ataqatigiinnit ajorineqanngilaq. Tele-Post-ip namminersortunngorsarnerata kinguneranik IT-mi ineriartornermi nunarput marluinngorluni avissasoq ernumanaatilerujussuusoq partiimit oqaatigineqarpoq.

- Inuiaqatigiit ataatsimoorullugu pigisaat inuiaqatigiinnut tamanut sullissisuusussaapput, namminersortunngorsarneqassappatalu inuiaqatigiit ilaannaasa iluanaarutigissanngilaat, Qaasuitsup Kommuniani kommunalbestyrelsimi ilaasorta Bendt B. Kristiansen tusagassiutinut nalunaarummi oqarpoq.

Demokraatit isornartorsiorneqarput
- Eqqortuusinnaanngilarmi nunatsinni isorliunerusut IT-mi ineriartortuarsinnaanerat innarlerlugu Tele-Post aaqqissuuteqqinneqassasoq namminersortunngorsarneqassasorluunniit – naak tamanna Demokraatit soqutigerpasinngilluinnaraluaraat, Bendt B. Kristiansen oqarpoq.

Oqarporlu eqqaamasassatta ilarigaat Nunatsinni TelePost-ip neqeroorutaanik atuisut annerusumik minnerusumilluunniit tamarmiullutik Tele-Post-imik ingerlalluarnera akilersormassuk.

- Nunatta isorartunerujussua peqqutingalungu suut tamarmik namminersortunngorsarneqarsinnaanngillat inuiaqatigiit tamaasa ataatsimut neqeroorfigineqartuaannarsinnaanissaat piumasaqaatigiutingalugu, IA tunuliaqutaralugu politikkeri oqarpoq.

Powered by Labrador CMS