Apartheid
IA: Apartheidimut assersuussineq eqqunngitsumik paasissutissiineruvoq
Per Rosing-Petersenip (PN) ammip qalipaataanik immikkoortitsinermut assersuussinera Inuit Ataqatigiit sakkortuumik akerlilerpaat
Inatsisartunut ilaasortaq Per Rosing-Petersen (PN), Nunarput Afrikamut Kujallermut assersuullugu akerleriissutaasumik oqaaseqarnermi kingorna, ulluni makkunani akerlilerneqaqattaarpoq.
Partiip siulittaasuata Hans Enoksenip taassuma oqaaseqaataanit isumaqataannginnerarpoq, tamannalu 'akuersaagassaannginnerarpaa'.
Atuaruk: Partii Naleraq immikkoortitsinermik oqaaseqarnermit isumaqataanngilaq
Ataqqinninngitsumik oqaaseqarneq
Inuit Ataqatigiit isornartorsiuinermut maanna aamma ilanngupput.
Partii tusagassiuutinut nalunaarummi allappoq, Per Rosing-Petersenip oqaaseqarnera nunani allani apartheidimik naalakkersueriaatsinik eqqugaasimasunut ataqqinninnginnerusoq sakkortooq.
- Apartheid ammip qalipaataa tunngavigalugu inatsisitigut aalajangersakkamik immikkoortitsineq toqqammavisigisimavaa toqoraanernillu inuiannillu naalliutsitsinernik annertuunik kinguneqartitsisimalluni. Apartheidimut assersuussineq annertuumik eqqunngitsumik paasissutissiineruvoq, partii allappoq.
Assigiinnginneq akiorneqarli
- Immikkoortitsinernik naligiinnginnermillu akiuinissamut iliuuseqarnissamut tamanik qaaqqusivugut. Oqallinnermili kamassarneq uumissuinerlu atorneqassanngilaq. Oqallinnermili pisariaqartumi apartheidimik assersuussinerit kamassarnerillu avissaartuutitsinermik annertuumik pilersitsissapput, tamannalu akerlilerumavarput, partii illuatungiliuttoq oqariartuuteqarpoq.
Partiip erseqqissarpaa, inuiaqatigiittut assigiinngisitaartutut assigiinngissutsit ammasumik eqqartorsinnaasariaqartut.
Atuaruk: Justus aamma Naaja: Qinngarsuilluni oqalugiarneq unitsinniarli
- Nunarsuarmioqatigiilli akornanni kusanaannerpaamik naalakkersueriaaseqarsimanernut assersuutigissallugit tunngavissaqanngilluinnarpoq, Inuit Ataqatigiit allapput.
Atuaruk: Rosing-Petersenip ammip qalipaataanik immikkoortitsinermik oqaaserisani aalajangiusimagai