2015-imut aningaasanut inatsit

IA aningaasanut inatsisissatut siunnersuummut: Ernumaammernarpoq

Aningaasanut inatsisissatut siunnersuummut 2015-moortumut isumaqatiginninniartoqarnissaa Inuit Ataqatigiinnit neriuutigineqarpoq

Naaja Nathanielsen, Kuupik Kleist og Sara Olsvig
Inatsisartuni ilaasortat Inuit Ataqatigiinneersut, saamerlermit Sara Olsvig, Kuupik Kleist kiisalu Naaja Nathanielsen

Aningaasanut inatsisissatut siunnersuut 2015-moortoq atuareerlugu Nunatsinni aningaasaqarnerup ilorraap tungaanut saatinneqarnissaa Inuit Ataqatigiinnit upperineqanngilaq. Aningaasat eqqortumik atorneqassappata amigartoortoqarnissaanut Inuit Ataqatigiit isumaqataassapput.

Kalaallit Nunaat 83,5 millionit koruuninik amigartooruteqarnissaq Naalakkersuisunit aappaagumut aningaasanut inatsisissatut siunnersuutip saqqummiunneqarnerani naatsorsuutigineqarpoq. Aningaasaqarnermut nunamullu namminermut naalakkersuisup Vittus Qujaukitsup Siumumeersup siunnersuut marlunngornermi saqqummiuppaa.

- Naak Naalakkersuisut ajornartorsiutinik takunnissinnaagaluarlutik iliuuseqarnissaminnut tunuarsimaartut malunnarpoq. Naalakkersuisuniit aaqqiissutissatut tikkuunneqartut arlal-lit Inuit Ataqatigiinnit piviusorsiunngitsutut aammalu Naalakkersuinikkut naammattumik sapiissuseqanngitsutut nalilerpagut, Inatsisartuni aningaasaqarnermut ataatsimiititaliami ilaasortaq, Naaja Nathanielsen oqarpoq.

Neriunaateqanngitsoq
Namminersorlutik Oqartussani allaffissornikkut 42,5 million koruuninik ilaatigut sipaarniartoqassasoq Naalakkersuisunit siunnersuutigineqarpoq. Ilaatigut pisiortortarnerit sipaarniarneqassapput. Nunanut allanut pisiortortalernissat Inuit Ataqatigiinnit ernumassutigineqarpoq.

- Tamanna suliffinnik ilinniarfissanillu naleqassaaq, aningaasarsiornikkullu ajornartorsiutitsinnik annertusaassalluni, Naaja Nathanielsen oqarpoq.

Namminersorlutik Oqartussat suliffeqarfiutaannik aningaasatigut tapersiinerit annikinnerussapput.

- Paasisariaqarparput assartuinermut akit aammalu ikummatissanut akit qaffannerisigut suliffeqarfinnik ingerlatsineq aamma akitsussammat. Akiligassallu tamakku atuisunut ingerlateqqiinnartariaqanngillat, Naaja Nathanielsen oqarpoq.

Inuit Ataqatigiit isumaqatiginninniarnissamut piareeqqasoq oqaatigaa.

- Siunissatsinni iluaqutaasinnaasunik naaperiarfiusinnaasut arlaqartut takusinnaavagut. Inuusuttut suliffissaqanngitsut pillugit suleqatigiittariaqarpugut, inuussutissarsiornerni tamani atugassarititaasut pillugit aammalu atugarissaarneq pillugu ataatsimoorfissat, pisortat kiffartuussineranni qitiusut soorlu peqqinnissakkut, angallannikkut ilinniartitaanikkullu ataatsimoorussaqartariaqarpugut. 2015-imi Aningaasanut Inatsisissaq pillugu piviusumik isumaqatigiinniarnissarput qilanaaraarput, Naaja Nathanielsen oqarpoq.

Powered by Labrador CMS