IA aningaasanut inatsimmut suli piffissaqarnerunissamik piumasaqarniarpoq
Aningaasanut inatsisip pilersinneqarnerata suliarineqarnera Aqqaluaq B. Egedep kusanannginnerarpaa. Inatsisip suliarineqarnissaanut killigititap sivitsorneqarnissaa, taassuma piumasaraa.
Inatsisartut aamma ingammik aningaasaqarnermut akileraartarnermullu ataatsimiititaliat aningaasanut inatsimmik suliarinninnissamut piffissaqarnerusariaqartut, Inuit Ataqatigiit siunnersuutigaat.
Partiip oqaaseqartartua, Aqqaluaq B. Egede aningaasaqarnermut inatsisip ullumi oqallisigineqarnerani taama oqarpoq. Aningaasanut inatsit nalinginnaasumik kingusinnerpaamik novembarip 15-anni akuerineqareertussaavoq. Inatsisartut aamma Naalakkersuisut pillugit inatsimmi tamanna atuarneqarsinnaavoq. Kisianni maanna IA-p inatsit immikkut ittoq atorlugu ulloq taanna nuutsikkusuppaa. Tassami allanngorartumik saqqummiussisoqarnerata kingorna, aningaasaqarnermut akileraartarnermullu ataatsimiititaliap aningaasaqarnermut inatsit illersorsinnaasumik suliarinissaanut piffissaqarunnaarsimasoq, Aqqaluaq B. Egede isumaqarpoq.
- Naalakkersuisuusimasut missingersuutaat massakkullu naalakkersuisooqatigiilersut suleqataasalu qanoq aamma sutigut allannguuteqartissaneraat piaartumik paasisariaqarparput. Aningaasaqarnermut Ataatsimiititaliap sulinissaminut piffissakinnera eqqarsaatigineqartariaqarpoq, suliassaq annertummat peqqissaarunneqartariaqarlunilu, taanna oqaaseqarnermini oqarpoq.
Aningaasanut inatsisissatut siunnersuut, aningaasaqarnermut naalakkersuisuusimasumit, Pele Brobergimit (PN), ataasinngornermi aggustip 20-anni saqqummiunneqaraluarpoq. Tunniussiffissap qaangiutinngilaarneranni, ullut sisamaannaat qaangiuttut allanngortillugu tunniunneqarpoq, mittarfiit aningaasalerneqarnissaat ilanngussalerlugu. Tamanna aningaasaqarnermut ataatsimiititaliap siunnersuut oqaluuserereeraalu seminarertoqarnerata kingorna pivoq.
- 2019-imut Inatsisartut Aningaasanut Inatsisissaattut siunnersuut naalakkersuisuniit saqqummiunneqaqqaarnerminiit torersumik suliaanngitsoq tamatta nassuerutigisinnaavarput, Aqqaluaq B. Egede oqarpoq.
- Pissutaasunut ilaavoq Aningaasaqarnermut Ataatsimiititaliap missingersuutit pillugit isumasioqatigiinneq naammassigaallu Naalakkersuisut allannguutissanik annertuunik siunnersuuteqarmata. Tamanna annertuumik ataatsimiititaliap sulineranut akornusiisumik, aamma ulloq manna tikillugu suli ataatsimiititaliap kinguaattooqaneranut suliamillu uninngatitsisariaqarneranut kinguneqartumik. Naalakkersueriaaseq taamatut aqutseriaaseqarfiusoq Inuit Ataqatigiit isumaqatiginagulu iluarsiivigeqquarput.
Maanna Pele Brobergip paarlattaata Vittus Qujaukitsup (NQ) siunnersuutip allannguiffigeqqinneqarnissaa oqariartuutigaa.
Kisianni qanorluunniit pisoqaraluarpat, novebarip 15-aniutinnagut torersumik suliarineqarnissaa periarfissaajunnaarpoq.
- Aningaasaqarnermut ataatsimiititaliap piviusorsiortumik aningaasanut inatsisissamut siunnersuutip suliarinissaanut periarfissaqanngilaq.
Tamannalu tunuliaqutigalugu inatsimmik immikkut ittumik akuersissuteqartoqarnissaanik piumasaqarpoq.