Nuuk
IA angerlarsimaffeqanngitsunut annerusumik iliuuseqarusuppoq
Inuit 36-t angullugit amerlassusillit inissiani mikisuni pingasuni tattorliuutsinneqarlutik ataatsimoortinneqartarnera akuersaarneqarsinnaanngilaq
NIA – IA-p Nuummi immikkoortortaa – kommunimi angerlarsimaffeqanngitsorpassuarnut atugassarititaasut pitsaanngitsut suliniuteqarfigineqarnerannik annertusaarusuppoq. Taama pisoqarpoq Nuummi angerlarsimaffeqanngitsunut atugassarititaasut pillugit siulersuisunut ilaasortamit Hans-Ludvig Zeebimit ullormut oqaluuserisassatut siunnersuut gruppimit oqaluuserineqareersorlu. Tamatumunnga atatillugu immikkoortortaqarfik Kommuneqarfik Sermersuumi IA-p kommunimi gruppianut saaffiginnippoq suliniutissanik angerlarsimaffeqanngitsut ikinnerulissutigisassaannik angerlarsimaffeqanngitsunullu atugassarititaasut pitsanngorsarneqaatigisassaannik piaanerpaamik suliniuteqarnissaq siunertaralugu iliuuseqaqqullugit.
NIA tamatumunnga atatillugu tusagassiuutitigut nalunaarummi ima allappoq:
- NIA-mi isumaqarpugut Nuummi angerlarsimaffeqanngitsut oqqiffissaqarumallutik inissiani mikisuni aserfallassimaqisuni pingasuni arnat angutilllu akuleriissillugit 36-llu angullugit amerlassuseqarlutik tattorliuutsinneqartariaqartarnerat akuersaarneqarsinnaanngitsoq. Pissutsini tattorliuuffiusuni taama ittuni angerlarsimaffeqanngitsut nerisassiorneq, nerineq ulluinnarnilu sammisassat eqqarsaatigalugit ulluinnarni inuunermik sapinngisamik nalinginnaasumik inuuneqarniartariaqartarput. Unnukkut inissiani tamani inuit 12 angullugit amerlassusilinnut inissalinni iggaveeqqallu saniatigut marlunnik mikisunik isersimaartarfilinni madrassini sapinngisamik sinilluarniartariaqartarput. NIA-mit inissianik misissuiartornitsinni tipi kuuffinneersoq sakkortooq aamma maluginngitsoorsinnaanngilarput.
Allaaserisaq una Nuuk Ugeavisimi saqqummersinneqaqqaarpoq. Taamaattumik tassannga aallaaveqarpoq. Nuuk Ugeavisimi allaaserisat allat akeqanngitsumik uani aasinnaavatit: