anbragte børn og unge
IA-mit: Angajoqqaat meeqqaminnut sumiginnaasarnerat inuiaqatigiinnut ajornartorsiutaavoq
Sapaatip-akunnerini kingullerni Kommuneqarfik Sermersuumi meeqqat angerlarsimaffimmik avataanut inissitat amerleriarujussuarsimanerat ajunngitsortaqarlunilu pitsaanerusumik inissisimasoqartoqartariaqarnera pillugu IA-mit Aaja Chemnitz Larsen oqarpoq
- Inatsisip siunertaata malinneqarnera pillugu nassuiaasoqartariaqarpoq.
Inuit Ataqatigiit tunuliaqutaralugit Inatsisartuni ilaasortaq Aaja Chemnitz Larsen oqaaseqaateqarpoq.
Sapaatip-akunnerini kingullerni Kommuneqarfik Sermersuumi meeqqat angerlarsimaffimmik avataanut inissitat amerleriarujussuarsimanerat pillugu nutaarsiassatigut sammisaqartoqarpoq. Kommunip nammineq tamatumani qaffariarujussuarnerup toqqaannartumik pissutai sisamat tikkuarpai, taakkununnga ilaallutik innuttaasut akornanni meeqqat atugarliornerat ernumagineqalersillugu eqeersimaarnerulerneq aamma sulisut ilinniarteqqinneqarsimanerat.
- Pitsaasuuvoq innuttaasut amerlanerit nalunaaruteqartalersimammata sulisullu ilinniarteqqinneqarsimammata, suliat kommunip nammineq eqqaasaasa suliarinissaannut, Aaja Chemnitz Larsen tusagassiutinut nalunaarummi oqarpoq.
Inuiaqatigiinnit ersiutit
- Aammattaaq meeqqat isaanniit pitsaasuuvoq, nalunaarutit iliuuseqarfigineqartarnerat, kisianni inuiaqatigiit ajoquteqarnerannut ersiutaavoq, angajoqqaat taama amerlatigisut, angajoqqaatut akisussaaffimminnik tigusisinnaanngimmata.
Aaja Chemnitz Larsenip ilisimatitsissutigaa, Inatsisartut Ilaqutariinnermut Peqqissutsimullu Ataatsimiititaliaani inissitsiterluni ataatsimiinnermi kissaatigisimallugu, meeqqanut angerlarsimaffiup avataanut inissitanut naleqqiullugu suliniutit pillugit isumasioqatigiinnermit atortussiat nutaanerpaat Naalakkersuisut tungaanniit saqqummiunneqassasut. Taamaaliornikkut Ilaqutariinnermut Peqqissutsimullu Ataatsimiititaliaq nutaaq ilisimatinneqaqqullugu, meeqqat angerlarsimaffiup avataanut inissitat pitsaanerusumik atugaqarnissaat qularnaarumallugu suliniutit suut aallartinneqarsimanerannik.
Ilaqutariinnermut Peqqissutsimullu Ataatsimiititaliaq januarip naanera nallertinnagu ataatsimiissasoq naatsorsuutigineqarpoq.