Qeqertarsuatsiaat

IA: Akulerutsitsinissamik neriorsuutertik naalakkersuisooqatigiit qimarratigaat

Partiip illua'tungiliuttut tupigusuutigaa Naalakkersuisut innuttaasunik ataatsimiititsimmata, kommunit attorneqartut akulerutsinnagit

- Tamanna ajoraluartumik Naalakkersuisut kommuninik akulerutsitsisannginnerannut assersuutissaavoq nutaaq, Naaja Nathanielsen isumaqarpoq

Taamatut isornartorsiuivoq Naalakkersuisut siulittaasuat Kim Kielsen, aalisarnermut naalakkersuisoq Karl-Kristian Kruse kiisalu inuussutissarsiornermut naalakkersuisoq Vittus Qujaukitsoq, tamarmik Siumumeersut, qanittukkut Qeqertarsuatsiaani innuttaasunik ataatsimiititsinerisa kingorna.

Innuttaasunilli ataatsimiititsinissaq sioqqullugu Kommuneqarfik Sermersooq, nunaqarfimmi aatsitassarsiornermut aalisarnermullu politikkimik ingerlatseqataasimasoq, paasissutissinneqaranilu qaaqquneqarsimanngilaq.

Akulerutsitsinnginnerlu tamanna naalakkersuisooqatigiinnissamik isumaqatigiissutip oqaasertaanut akerliuvoq, tassani allassimammat »sulineq tunngaveqassasoq unneqqarissuunermik, uppernassusermik ammasuunermillu«, soorluttaaq naalakkersuisooqatigiit aamma oqaatsit soorlu aalajangeeqataanissaq akulerutsitsisarnissarlu isumaqatigiissummi pingaartissimagaat, Inuit Ataqatigiit isumaqarput.

Ataqqinninngitsut

– Tamanna qanoq isilluni ataqqinninneruva, qanorlu isilluni suleqatigiinnissamut oqaloqatigiinnissamullu qaaqqusineruva? Tamanna ajoraluartumik assersuutissaavoq nutaaq, Naalakkersuisut kommuninik akulerutsitsisannginnerannut. Qanittukkut kapisilinnut nutaamik pilersaarusiortoqarpoq, tamatumanissaaq Naalakkersuisut isumaqarsimapput kommunit tusarniarneqassanngitsut, Inuit Ataqatigiit politikkikkut oqaaseqartartuat Naaja Nathanielsen tusagasssiorfinnut nalunaarutikkut allappoq.

Tamatuma saniatigut politikerip IA-meersup tupigusuutigaa aatsitassanut naalakkersuisoq Andreas Uldum, Demokraatit, peqataasimanngimmat, innuttaasunik ataatsimiititsinermi sammisat tassaasimagaluartut »aalisakkat rubinillu«.

Innuttaasunik ataatsimiititsinerni kommunit akulerutsinneqartannginnerat pillugu Inuit Ataqatigiit Naalakkersuisut nassuiaateqaqquvaat.

Powered by Labrador CMS