isumalioqatigiissitaq

IA: Akissaasersuisoqaranilu ineqartitsisoqassanngilaq

Tunngaviusumik inatsisissaq pillugu isumalioqatigiissiaq suliassap nassuiarneqarnera malillugu allatut pinnani sulissaaq. IA-p naalakkersuinikkut oqaaseqartartua Bendt B. Kristiansen oqarpoq.

Bendt B. Kristiansen

Tunngaviusumik inatsisissaq pillugu isumalioqatigiissitamut ilaasortanut akissarsiaqartitsisoqassanngilaq imaluunniit siulittaasumut atorfilittut inigisaqartitsisoqassanngilaq. IA-p tamanna killiffigigaa partiip naalakkersuinikkut oqaaseqartartuata Bendt B. Kristiansenip naqissuserpaa.

- Suliassap nassuaataani allaqqasunut taamaallaat malinninniarpugut, taanna Sermitsiaq.AG-mut oqarpoq.

Allattoqarfiup nukittorsarneqarnissaa kisiat taperseraat
Tunngaviusumik inatsisissaq pillugu isumalioqatigiissitamut ilaasortat sulinertik akissarsiaqaatigissanngikkaat ersarissumik allassimavoq. Siulittaasup ineqartinneqarnissaa taakkartorneqanngilaq.

2018-mut aningaasanut inatsisissamut atatillugu isumalioqatigiissitamut saniatigut 500.000 koruuninik immikkoortitsisoqarpoq. Naalakkersuisut naapertorlugit aningaasat taakku allattoqarfiup nukittorsarneqarnissaanut, siulittaasup ineqartinneqarneranut imaluunniit ilaasortanut akissarsiaqartitsinermut atorneqassapput.

Kisianni IA aalajangiisuussagaluaruni, taakkunannga pingasuusunit ataaseq partiip akuersaarsinnaavaa.

- Aningaasanut inatsimmik isumaqatiginninniarnerni oqaatigeriikkatsitut allattoqarfiup nukittorsarneqarnissaa akuersaarparputm Bendt B. Kristiansen oqarpoq.

Inatsisartunut ilaasortaassasut
Vivian Motzfeldtip Inatsisartunit tunuarluni isumalioqatigiissitami suliaqarluni siulittaasuunissaa taamaammat akuersaarsinnaanngilaa. Suliassammi nassuiarneqarneranni Inatsisartunut ilaasortaannaat isumalioqatigiissitamut ilaasortanngortinneqartassapput.

Tunngaviusumik isumalioqatigiissitamut ilaasortaq Inatsisartunut ilasortaajunnaaruni tunuartussaavoq.

- Oqaatigeriikkatsittut suliassap nassuiaataanut aalajangiusimavugut, allanngortinneqassappallu Inatsisartuni amerlanerussuteqartoqartariaqarpoq, naalakkersuinikkut oqaaseqartartoq oqarpoq.

IA-p aallaqqaammut inuit Inatsisartunut ilaasortaanngitsut isumalioqatigiissitamut toqqarneqarsinnaanerat tunngavilersuutiginikuusimagaluaraa, taassuma maluginiaqquaa.

- Suliassap nassuiaataa allanngortiterlugu aallartikkaanni, uagut isummernerput suli attatissavarput.

Partiip isummernera
Ane Hansen aamma Mimi Karlsen Inuit Ataqatigiit sinnerlugit isumalioqatigiissitamut ilaasortaapput.

- Ane Hansenip aamma Mimi Karlsenip oqariartuutit isumaqataaffigaat?

- Tamanna naatsorsuutigaara.

- Kisianni IA-p una taama isummersuutigigaa paasissavara?

- Aap, taanna ilumoorpoq.

Aamma atuaruk: Motzfeldt suliutigaluni siulittaasuuniarpoq

Powered by Labrador CMS