Aningaasanut inatsit
IA: Aappaagu ilaatinniarluta neriorsorpaatigut
Qallunaat aningaasanut inatsisaat aappaagu isumaqatiginniuniutigineqalerpat, Inuit Ataqatigiit qularutiginngilaat partii tassunga peqataassasoq
Ullumi sisamanngornermi qallunaat aningaasanut inatsisaat Folketingimi amerlanerussuteqartunit akuerineqarpoq. Aningaasanut inatsit, ilaatigut politiinik nukittorsaasussaq, kalaallit politeeqarnerannut aamma sunniuteqartussaasoq inatsisinik atuutsitsinermut ministerip neriorsuutiginikuuaa.
Siumut Socialdemokratinut aningaasanut inatsimmut akuersisunik isumaqatigiissuteqarput taasisinnaanatik, IA-lu tassani taaseqataanngilaq.
Partii illuatungiliuttoq, kalaallit partiivisa aningaasanut inatsimmut isumaqatiginninniarnermut ilaatinneqannginnerminnut akerliullutik taama iliorput.
Hjorth qularnaveequsiivoq
Ippassaq pingasunngornermi aningaasanut inatsisip oqallisigineqarneranili Inuit Ataqatigiit Venstremut tatiginnileqqipput, aappaagu ilaanissamut neriuuteqalersitsisumik.
- Aningaasaqarnermut ministerip oqaaseqarnermini siunissami aningaasanut inatsisissat isumaqatigiinninniutigineqaleraanagata, IA toqqaannartumik pinngitsooratik peqataatinneqartalissasoq neriorsuutigivaa, Aaja Chemnitz Larsen (IA) oqarpoq.
Atuaruk: Politeeqarnerup pitsaanerulernissaa inatsisinik atortitsinermut ministerip neriorsuutigaa
Tamanna Sermitsiaq.AG-mut Venstreminngaanniit uppersitinnissaanut periarfissaqarsimanngilaq, kisianni IA-p tungaaninngaanniit tamanna tunngavigalugu nalilerneqarpoq, aappaagu upernaakkut 2017-mut aningaasananut inatsisissaq isumaqatigiissutiginiarneqalerpat peqataanissamut qulakkeerneqartoq.
Aaja nuannaarpoq
- Nuannaarutigaara Aningasaqarnermut ministerip taamatut oqaaseqarnermini siunissami Danmark-imi aningaasanut inatsisissaq isumaqatiginninniutigineqaleraangat soorunalumi peqataatinneqartalernissarput aamma uppernarsarmagu. Taamatut neriorsuuteqarneq Nunatsinni susassaqarfinnut suli danskinit oqartussaaffigineqartunut aammalu kalaallinut Danmarkimi najugaqartunut pingaarutilerujussuuvoq, tassami kalaallit Folketingimi ilaasortaatitaat folketingimi ilaasortaatitaasut allat pineqarnerattut aammalu naligilluinnarlugit ataqqineqartussaapput.