kommuner
IA aamma Siumut kommunit akornanni avissaartuunneq
Borgmesteri Ane Hansen KANUKOKA-mut isornartorsiorpoq, Kommuneqarfik Sermersuumullu saalluni. KNR taama allaaserisaqarpoq.
Januaarip aallaqqaataat 2019 aallarnerfigalugu KANUKOKA-mi ilaasortaajunnaassanerlutik, ikaarsaariarnermut ataatsimiissitaliaq novembarip 28-iani ataatsimiinnerminni aalajangissavaat.
KNR taama allaaserisaqarpoq.
- Ikaarsaariarnermi sulinermi aasap ingerlanerani KANUKOKA immaqa atorfissaqartingaatsiarsimagaluarparput kisianni tassa maluginikuunnginnatsigu aamma paasiniaarujussuartuunngimmata KANUKOKA massakkut, Ane Hansen (IA) KNR-imut oqarpoq.
Taarsiullugu maanna Kommuneqarfik Sermersuumik suleqateqarniarnissaq anguniarpaa, tassani ilisimaneqareersutut parteeqataa Asii Chemnitz Narup borgmesteriuvoq. Kommunip nutaap pilersikkiartorneqarnerani tassanngaanniik ikiorneqarsimanini, KNR-imut nassuiaatigaa.
Kommuneqarfik Sermersuup kommunit kattuffiat 2016-imi qimappaat. Tamanna kommunit akornanni naligiissaarneqarnerannut isumaqatiginninniarnerni KANUKOKA-p iliuuserisaanut akerliulluni pivoq.
Ane Hansenip kingullermik nalunaaruteqarnerani Nunatsinni kommunit partiit assigiinngissutaannut avinneqarpasilerput. Kommunit Siumumit siuttuuffigineqartut, Avannaata Kommunia, Qeqqata Kommunia aamma Kommune Kujalleq KANUKOKA-mut ilaasortaasut, kommuninilu IA-p siuttuuffigisaat Kommune Qeqertalik aamma Sermersooq illuani suleqatigiillutik.