ajornartorsiutit
IA aamma Siumut aaqqiagiinngissuteqartut
Pituffimmi kiffartuussinissamut isumaqatigiissutip annaaneqarsimasup suliarinerata takutippaa Nunatsinni partiit anginersaat marluk suleqatigiissinnaanngitsut
Siammasissumik suleqatigiittoqassaaq.
Siammasissumik suleqatigiittoqassaaq.
Siammasissumik suleqatigiittoqassaaq.
Inatsisartunut qinersinissamut qineqqusaarnermi qinigassanngortittut taamattut oqariartuuteqaqattaarput.
Taamaakkaluartorli Naalakkersuisunut siulittaasuulersimasoq Siumumeersoq Kim Kielsen aamma illuatungiliuttuni siulittaasoq Inuit Ataqatigiinnit Sara Olsvig, qinersisoqareerneranit qaammatit marluk qaangiuttut, qineqqusaarnermi suleqatigiinnerunissamik oqariartuutertik, eqquutinngilaat.
Kalaallit Nunaanni partiit annersaat marluk suleqatigiissuteqarnatillu imminnut attaveqatigiinngillat.
Pituffimmi kiffartuussinissamut isumaqatigiissutip annaaneqarsimaneranut Københavnimi oqallinnermi paasinarsivoq, qanoq partiit imminnut attaveqatigiinnersut, danskit aviisiat Informationen allappoq.
Sara Olsvig ugguarpoq
- Qineqqusaartoqarunnaareerpoq, sooruna tusagassiuutitigut immissinnut isornartorsiortarpisi? Ajornartorsiutit ataatsimut aaqqissinnaannginnassigit? Danskit aviisiat Sara Olsvigimut apeqquteqarpoq. Imalu akivoq:
- Assigiinngitsunik anguniagaqarpugut. Ajoraluartumik Naalakkersuisuusimasut siuliisut maannakkut Naalakkersuisuusut uagutsinnut matoqqapput.
Inuit Ataqatigiinni siulittaasutut sooruna Naalakkersuisunut siulittaasup kaffisoqatiginissaa aaqqissuussinnaanngiliuk?
- Naalakkersuisooqatigiinnissamik isumaqatiginninniarnerni taamaasiorpunga. Kim Kielsen kaffisoqatigaara. Suleqatigiissimasinnaagaluartugut malugaara. Inuit Ataqatigiinni Siumumilu siulittaasut aatsaat taama oqaloqatigiissinnaatigigunaraluarput. Siammasissumik suleqatigiinnissaq pillugu suliniartoqannginnera uggornartoqartippara. Tamannami uagut tungitsinnit piareersimaffigigaluarparput. Malugisinnaavarali Siumut tamakkiisumik IA-mik suleqatiginnikkumanngitsoq, Sara Olsvig Informationenimut oqarpoq.