Forvaltning
IA: Aalisarnermut politikki sangujoraartoq
Aalisarnermut inatsit nutaaq tusarniaavigineqarpoq, tamatumunngalu atatillugu IA-p qulaajaqquvaa taanna qanoq ingerlanneqassanersoq: – Aalisarneq inuussutissarsiutitta annersaraat, IA tunngavilersuivoq
Naalakkersuisut siulittaasuata Aleqa Hammondip ammaanersiorluni aalisarneq pillugu oqalugiarnera aallaavigalugu IA-p arlalinnik apeqquteqarfigaa. Tamanna pivoq aalisarnermut inatsisip tusarniaavigineqarnera pissutigalugu.
Inuit Ataqatigiinneersut Ane Hansenip Naaja H. Nathanielsenillu ilaatigut paaserusuppaat inatsit qanoq ingerlanneqassanersoq. Naalakkersuisunut apeqqumminni toqqaannartumik allapput aalisarnermut poltiikki sangujoraartuusoq tamannalu inuussutissarsiummut aningaasaleerusunnissamut ajoqutaalluinnassasoq.
– Naalakkersuisut siulittaasuat oqarpoq aalisarnermut inatsimmi anguniakkatut aalajangiussami atuisut ilisimasaat ilanngunneqassasut, biologit siunnersuinerat assigalugu. Ilanngullugu aamma oqarpoq Naalakkersiusunut pingaaruteqartoq pisassanik aalajangiinerit ilisimatuut inassuteqaaataannik tunngavilimmik aallaaveqartarnissaat, tamatumani ilanngullugu nungusaataanngitsumik tunngavik. Paaserusupparput biologit siunnersuinerannik atuisullu ilisimasaannik qanoq naleqqiussisoqar-toqassanersoq aammalu nunap pisuussutaanik piujuartitsineq tunngavigalugu aqutsinissaq pillugu pisussaaffigilerisimasatsinnut tunngasunut tamanna qanoq sunniuteqassanersoq. Aammattaaq ullumikkut atuisut ilisimasaat ataatsimut naliliinermi ilaatinneqariinngitsutut inatsimmik allanngortitsinikkut naqqinniarne-qarnersoq paaserusupparput, Inatsisartunut ilaasortat taakku marluk aperipput.
Inissisimanerit
Aamma oqaatsit inissisimanerit piginnittuunerlu nassuiaqquvaat:
– Naalakkersuiusut aalisarnermut inatsisaata siunertaasa ilagaat “sinerissamut qanittumi aalisarnermi piginnittuunerup eqiterneqarpallaarsinnaanerata pinngitsoortinniarneqarnissaa." Tamannali Inatsisartut inatsisaatigut nr. 8, 22. november 2011-meersukkut § 15, imm. 4-mi qulakkeerneqariinnginnerpa, tassannga ersermat suliffeqarfiit inuilluunniit ataasiakkaat pisassiissutinit pigisanik pisinik-kut sinerissap qanittuani aalisariutit immikkoortuini killilersuiffigineqartumi 15 %-init amerlanerusunik pisassiissutinit pigisaqalersinnaassanngitsut aammalu Inat-sisartut inatsisaatigut nr. 5, 4. Juni 2012-imeersukkut § 15, imm. 5-imi, tassannga ersermat ingerlatseqatigiiffiit inuilluunnit ataasiakkaat qaleralinniarnermi pisassiissutit ilaannik toqqaannartumik toqqaannanngitsumilluunniit pisiner-mikkut sinerissamut qanittumi aalisartunut pisassiissutigineqartunit tamar-miusunit 5 % qaangerlugit pisassiissutit ilaannik pigisaqalersinnaassanngitsut?
Naalakkersuisut tunaartaraat sinerissap qanittuani inuuniutigalu aalisartuu-sinnaanerup, saniatigullu tulaassanik tigooraasutut nioqqutissiortutullu ingerlat-sinerit ataatsimoortillugit ingerlanneqarsinnaajunnaarnissaat. Naalakkersuisut tunngavilersuutigivaat inuussutissarsiuummi tassani kina sumi inissisimanersoq ersarissumik takuneqarsinnaalissammat. Aaqqissuussineq piusoq qanoq ililluni kia sumi inissisimaneranik erseqqarluttumik takusaqarfiugami? Aalajangernerup tamatuma aamma kingunerissanerpaa ingerlatsisut ullumikkut tunisassiorfimmik pisassiissutinillu ataatsikkut piginnittuusut tunisassiorfiutitik tuninngikkunikkit akuersissutinik arsaarneqartalernissaat? Tassunga atatillugu atorunnaarsitsi-nermut ikaarsaariarfeqartoqassava, taamaassappallu tamanna qanoq sivisussu-seqassava? Tamanna suliaqarfiup tungaatigut nalikilliliisarnermut malerua-gassianut atuuttunut naapertuutissava? Tunisassiorfimmik/akuersissutinik tunisi-soqartoqassagaluarpat massakkut piginnittuusut taarsiiffigineqassappat?
Taarsiissutit?
IA-p apeqqutiminut tunngavigaa aalisarneq Nunatsinni inuussutissarsiutit annersarigaat ilaqutariippassuillu inuuniutigigaat, qulaajaqquvaallu ingerlatsisut 50 procentimik aningaasarsiaqarnissamik piumasaat pinngitsoorniarlugu qanoq taarsiivigineqassanersut:
– Ammaanersiorluni oqalugiarnermi oqartoqarpoq: “Inuutissarsiutigalugu aalisarnermit isertitat affaasa (50%) piumasaqaatiginissaat Naalakkersuisooqatigiinni aalajangiiffigineqarpoq. Taamatut aalajangersakkap atuutilernerata kingorna aalisarnermik aallarniisimasut tamatumani eqqorneqassanngillat. Atuutsitsileqqinneq siunissami aalisarnermik ingerlatsi-sussanut atuuttussaavoq.” Oqaaseqaatip tamatuma aalisarneq pillugu inatsimmi nutaami maannakkut tusarniaassutigineqartumi siunnersuutigineqartumut § 6 imm. 4-mut paarlangalluinnartuunera uppernarsarneqarsinnaava? Aammattaaq uppernarsarneqarsinnaava naalakkersuinikkut nalunaaruteqartarnerit massakkutut allamut saaqattaarfiunerat inuiaqatigiinni kalaallini aningaasaleerusussutsimut sualuttumik ajoqutaammat, tamatumalu kingunerisimasinnaammagu ataasiakkaat ajunngitsumik siunertaqarlutik aningaasaliisarsimasimassasut aningaasaliissutitilli maanna annaasimassagaat? Inatsisiliornermi allannguummit inuit ataasiakkaat suliffeqarfiilluunniit eqqorneqartussat Naalakkersuisut aningaa-satigut taarsiiffigilersaarpaat?, Ane Hansen Naaja Nathanielsenilu aperipput.
Aalisarnermut inatsisip ingerlanneqarnissaanut katillugit qulingiluanik apeqquteqarput, arlalinnik ataatigut apeqqutitalinnik. Paragraf 37 naapertorlugu apeqqut talerpia´tungaani boksimi download-ersinnaavat.