IA, A, D aamma SAM suleqatigiinnissaat Suleqatigiissitsisunit neriiutigineqarpoq
Partiit sinneri Naalakkersuinikkut peersinneqartariaqalersut Tillie Martinussen isumaqarpoq
Siumup Naalakkersuinikkut suleqatissaminik Kim Kielsen maanna suleqatissarsiuleruttorpoq. IA aamma Demokraatit Naalakkersuisooqataalersinnaapput.
Suleqatigiissunit neriuutigineqarpoq IA aamma Demokraatit periarfissanik allanik ujartuisariaqartut.
- Piffissanngorpoq nunap siulersorneqarnerani inersimasumik akuusoqalernissaa!
Partiit akisussaassusillit IA, A, D aamma SAM kattuttariaqalerput, naalakkersuisoqatigiinnillu pilersitsillutik allallu partiit peersillugit, Tillie Martinussen tusagassiutinut nalunaarummi allappoq.
Taakku Naalakkersuisooqatigiilissappata Inatsisartuni amerlanerussuteqalissapput, tassami Inatsisartuni ilaasortani 31-ni 17-iulissammata.
Naalakkersuisooqatigiit unamminartitatik aaqqiivigisimasinnaagaluarai isumaqarpoq.
- Naalakkersuisoqatigiit isasoortut aallaqqaataaniilli paasiniaalluarnerusimasariaqaraluarput sunalu tamaat ammasumik ingerlallugu ilisimallugu suna iserfigilernerlugu.
- Meeqqerivimmiittuusineq unittariaqalerput inersimasullu taarsiillutik isumagalugulu - eqqissisimasumik - nunap siulersorneqarnissaa.
Tillie Martinussenip siunnersuutaa malinneqassappat Atassut iliuuseqartariaqarpoq. Taamaattoqarnissaali naatsorsuutigineqassanngilaq, tassami Atassutip siulittaasuata Siverth K. Heilmannip Sermitsiaq.AG-mut sapaatiummat oqaatigaa Naalakkersuisooqatigiinni ataannarusullutik.
- Tunuarnissarput isumaliutersuutiginngilarput. Kisianni maanna misissugassaqarpugut. Mittarfiliornissanut tunngasut pillugit paasissutissanik perusuppugut, Siverth K. Heilmann oqarpoq.