qinersineq 2014
IA 2014 tamaat siuttuusimavoq
Sermitsiap 2014-imi qinersisartunik isumasiuinerini tamani, HS-Analyse-mit ingerlanneqartartuni, IA tamatigut partiini annersaasarpoq - tapersersorneqarnerali appariartorpoq
Ukioq manna Sermitsiaq katillugit sisamariarluni qinersisartunik isumasiuisarpoq. Maajimi, septembarimni, oktobarimi novembarimilu. Isumasiuinerit tamarmik HS-Analyse-mit ingerlanneqartarsimapput.
Isumasiuinerit siusinnerusumi isumasiuisarnernit pitsanngoriaateqarsimapput, tassa inuit amerlanerusut apersorneqartarmata, aammalu isumasiuinerni nalornissutit ilanngunneqartalermata.
Isumasiuinerni tamani IA partiini annersaasarpoq, tapersersorneqarnerani 2014-imi maajimi 46 procentimiit 2014-imi novemberimi 38,5 procentimut appariarsimavoq. Piffissami tassani Partii Naleqqap tapersersorneqarnera 4,7 procentimiit 10,8 procentimut qaffariarpoq, Demokraatillu tapersersorneqarnerat 6,3 procentimiit 9,2 procentimut qaffariarpoq. Tassa ukioq manna taasinissat ilarpaalui IA-miit Partii Naleqqamut Demokraatinullu nuussimapput.
Isumasiuisarnerni tamani Siumup Atassutillu tapersersorneqarnerat aalajaatsorujussuusarpoq, Siumut 35 procentit missaannik Atassullu 6 procentit missaannik tapersersorneqarlutik. Partii Inuit 2 procentit missaannik tapersersorneqarpoq.
Isumasiuinerni tamani aperineqartut 20 procentiniit 25 procentinut amerlassusillit isummersimaneq ajorput. Qinersisartut tamakkua, qularnanngitsumik piffissaq kingulleq atorlugu kina taassanerlugu aalajangerumaartut, qinersinerup inerneranut kikkullu naalakkersuisunngortitsinissaannut aalajangiisuussaapput, taamalu kina Naalakkersuisuni siulittaasunngussanersoq aalajangissallugu. Isumasiuinerilli aamma takutippaat partiit mikinerit qinersinerup inernissaanut aalajangiisuulluinnassasut. Ilimanartoqanngilaq partiit anginerpaat marluk suleqatigiilerumaartut.
KNR DR-lu sinnerlugit Epinion-ip isumasiuinera, pingasunngormat tamanut saqqummiunneqartoq, HS-Analyse-p misissuineratut inerneqapajaarpoq - Epinion-ili naliliivoq HS-Analysep isumasiuinerini sisamani tapersersorneqarneranit ikinnerujussuarnik tapersersorneqartoq.
AG-mi pingasunngorpat saqqummersussami qinersinissaq sioqqullugu isumasiuineq kingulleq saqqummiunneqassaaq. Taanna aamma HS-Analysemit suliarineqarpoq.
Isumasiuinerit inerneri tamaasa Sermitsiami sapaatip akunnerani uani saqqummersumi takusinnaavatut, aviisili nettimi pisiniarfinniluunniit akeqanngitsumik aasinnaavat, nungussimanngippata.