Hurtigrutenip Kangerlussuaq tunuppaa
Norskit umiarsuaatileqatigiiffiata Hurtigrutenip Nunatsinni nunami sammisaqartitsinermini Kangerlussuaq tikitassatut taamaatillugu Reykjavikimik taarserniarpaa, tassani umiarsuaatileqatigiiffiup takornariartaassuanut nutaamut atugassarititaasut pitsaanerujussuupput. Nuummi mittarfissuup piareernissaata tungaanut tamanna atuutissaaq.
Nunatsinni nunami takornariartitsinermi Hurtigrutenip Kangerlussuarmiititsisarnermini 2019-mi naggataassaaq. Mittarfeqarfik manna tikillugu takornarianut umiarsuarmut ilaasussanut imaluunniit umiarsuaatileqatigiiffiup umiarsuaasa ilaannit niusut aqqusaartarfittut atorneqartaraluarpoq.
Hurtigrutenip aallaqqaammut Kangerlussuaq Islandip illoqarfiisa pingaarnersaannik, Reykjavikimik taarserniarpaa. Maannamuugallartoq aasaanerani 2020 tassani pineqarpoq.
Nuuk utaqqigaat
Kisianni ukiuni tulliuttussani qanoq pinissaa oqaatigiuminaappoq. Immaqa Reykjavikimiiginnassapput, immaqa aamma Canadami Halifax tikinneqartalersinnaavoq, umiarsuaatileqatigiiffimmi pisortaq, Thomas Westergaard oqarpoq. Nuummi mittarfissuassap piareernissaata tungaanut tamanna pissaaq.
Manna tikillugu Hurtigrutenip Nunarput umiarsuarnut ‘’Fram’’-imut aamma ‘’Spitsbergen’’-imut atortarpaa, taakku tamarmik immikkut 220-230-nik ilaasoqarsinnaapput.
- 2020-mi, Nuummilu mittarfissuup ammarnissaata tungaanut Reykjavik niusarfittut atussavarput. Umiarsuup nutaap 530-inik ilaasoqarsinnaasup atulertussaanera tamatumunnga ilaatigut pissutaavoq. Umiarsuup anginerusup timmisartumik tikittut aallartullu amerlanerusut kiisalu talittarfiit pitsaanerusut inissaqarnerusullu pisariaqartissavai. Reykjavikimi Kangerlussuarmut sanilliullugu pitsaanerujussuarmik logistikkeqarpoq, Thomas Westergaard oqarpoq.
Nuummi mittarfissuaqalissappat, umiarsuit aasaanerani Nuummi aallaaveqartumik Kalaallit Nunaanni aamma Canadap avannaani angalasarnissaat anguniagaavoq.
Umiarsualivik sikoqanngitsoq
- Nuummi anginerusumik talittarfiliornissatsinnik tamanna kinguneqassaaq, taannalu sikoqanngitsumik kusanartumik talittarfeqarpoq. Imaani inissisimalluarpoq, Kangerlussuarmitut kangerluup qinnguani inissisimaffeqarani, Thomas Westergaard oqarpoq.
Hurtigrutenip aalajangernera nunaqarfimmut Kangerlussuarmut piffissami matumani pakatsinarsimassaaq, tassami mittarfiup attatiinnarneqarnissaa ilungersuutigineqarpoq, taamaalilluni qulimiguulinnut mittarfinngunnginniassammat, Ilulissani, Nuummi aamma Qaqortumi mittarfissanut nutaanut pingasunut aningaasaliinissanut inuiaqatigiit aningaasaqarnerannik misissueqqissaarnermi tamanna periarfissatut misissuiffigineqarnikuuvoq.