aatsitassat
Hudson Resources: Takkuteqqingajalerpugut
Kangerlussuup eqqaani aatsitassarsiorfimmik mikinerusumik pilersaaruteqartut qinnuteqalerput. Qinnuteqaatip sivisuumik suliarineqarnissaa qinnuteqartussanit naatsorsuutigineqanngilaq. Suliaq aasaru aallartisarneqalissaaq
Hudson Resourcesip aatsitassamik anorthositimik piiaanissaminik naatsorsuutaanut qinnuteqaataa suliarineqaleruttorpoq. Taanna piiaaffimmi White Mountainimiissaaq. Qinnuteqaatip akuerineqarnissaa qaammatini pingasuni sivisutigisumik suliarineqassasoq naatsorsuutigaat.
Pisortaq Jamie Tuer tamanna ilisimatitsissutigaa. Taanna Torontomi aatsitassarsiorfiit saqqummersitsineranni Pdac-imi peqataavoq.
- Namminersorlutik Oqartussallu tamanna pillugu isumaqatiginninniuteqarpugut piffissami sivisuumi. Taamaattumik suliaq pilertortumik ingerlanneqassasoq naatsorsuutigaara. Tusarniaanerit sapaatit akunnerini arfineq pingasuni ingerlanneqassapput. Tassani pilersaarutigineqartut saqqummiunneqassapput. Qinnuteqaatitta qaammatini pingasuni tulliuttuni akuerineqarnissaa neriuutigaarput. Tassanngaannit IBA isumaqatiginninniutigineqassaaq. Talittarfimmik aqqusiniliornermillu sulinerit aasamut ingerlanneqarsinnaalernissaat neriuutigaarput, Jamie Tuer oqarpoq.
Fiberglassi plastikkilu
Kangerlussuup eqqaani White Mountain inissisimavoq, tassanilu calcium anorthositilu piiarneqarsinnaapput.
Tassanngaannit piiarneqareeriarpata umiarsuarmik ingerlanneqartassapput. Taava atortussianngorlugit suliarineqartassapput.
- Ukiumut 285.000 tonsit piiarneqartarnissaat naatsorsuutigaarput. 200.000-it suliassanngorlugit suliarineqartassapput, James Tuer oqarpoq. Itilliup tungaanut kangerluup eqqorneqannginnissaa aamma pingaartinneqarpoq, tassanimi piniartoqartarlunilu takornariaqartarpoq.
Sulisut 60-it
Suliarineqartussaq ajornanngitsuusoq pisortamit oqaatigineqarpoq. Navianartunik sulisoqassanngilaq, imermik mingutitsisinnaasoqarnavianngitsoq aamma oqaatigaa. Suliassaq annertunngilaq, tassani inuit 60-t sulisorineqassapput. Sulisut tallimararterutaat nunanit allaneersuussasut oqaatigaa.
- Kalaallit qaartiterinermut ilisimasallit, aqqusiniliornermut suliaqarsimasut maskiinanullu oqimaatsunut suliaqarsimasut sulisinneqassapput. Taakkumi kisimik suliarisussaavagut. Ilinniartitsineq suliffissallu ajornassanngillat, James Tuer oqarpoq.
Anorthositimik tunisineq akitsuutitaqassaaq royalty annikinnerpaaq atorlugu, tassa 2 procent. Suliffeqarfik aamma akileraassaaq suliassat pilersaarutaat sulisussanullu akileraarnerat ilanngaasiiffigineqareerpata.
Kangerlussuup avannaata tungaani Sarfartumi aamma suliffeqarfik piiaanissamut isumaqatigiissuteqarpoq. Tassani aatsitassanik qaqutigoortunik piiagassaqarpoq.