Narsaq
Hotel Narsaq allivoq
Akunnittarfiutillit Kattie Nielsenip Fridrik Magnussonillu KGH-p allafitoqaa pisiaraat, taannalu ataatsimeersuarnernut atorneqartassaaq
Kattie Nielsenip Fridrik Magnussonjillu, Hotel Narsaq-mik ingerlatsisut, akunnittarfimmik ingerlatsinertik annertusivaat.
Taakkua KGH/KNI-p allaffitoqaa pisiarisimavaat, ukiualuit matuma siornatigut allaffittut atorunnaaramili Pilersuisup pequtaarniarfiatut atorneqarsimasoq. Piffissami kingullermi illu aamma atuarfittut atorsimavoq.
Allanngortiterneqassaaq
Fridrik Magnussonip paasissutissiissutigaa qaammatut marlussuit qaangiuppata illu atuarfimmit attartorneqarunnaarpat illu sukkanerpaamik allanngortiterneqassasoq.
Allartitsisup ilanngullugu oqaluttuaraa marlunnik saaffigineqareersimalluni akunnittarfik aasaru ataatsimeersuarnernik ingerlatsiffiusinnaanersoq, taamaattumillu neriuutigalugu ´KGH-p allafffia´ taamanikkussamut ataatsimeersuarfissatut piareersimassasoq.
Attartittakkat
Allaffiup pisiarinerata saniatigut Hotel Narsap illut pisoqaanerit akunnittarfiup eqqaaniittut pisiarisimavai, taakkualu maanna iluarsaanneqaleruttorput.
Siunertaavoq illut piffissami sivikinnerusumi sivisunerusumiluunniit attartortinneqartarnissaat, akunnittarfimmik ingerlatsinerup ilaatut.