Piukkunneqartoq
'Homo Sapienne' nersornaasigassatut innersuunneqartoq
Niviaq Korneliussenip atuakkiaqqaava 'Homo Sapienne' Politikens Litteraturprisimik nersornaasigassatut piukkunneqartut arfineq-marluk ilagaat
Niviaq Korneliussen, atuakkiaminik 'Homo Sapienne'-mik 2014-ip naalernerani Danmarkimik tiguartitsisoq Politikenimilli kusanartumik nalilerneqartumik, nersornaammut Politikens Litteraturprisimut piukkunneqartut arfineq-marluk ilagaat.
Taamatut Politiken sapaammi allappoq.
– Atlantikup avannaani neriuutissaarunnermut tikilluarit. Niviaq Korneliussenip inuusuttut tallimat Kalaallit Nunaanneersut, inuunerminni ajornartorsiutillit, pikkunartumik oqaluttuarai. Imminnut naapittarput, Nuummi aamma illoqarfiummat, 'Homo sapienne'-p Politikens Litteraturpris-imut piukkunneqarneranut atatillugu aviisi ilisarititsinermini allappoq.
Niviaq Korneliussenip atuakkiaqqaamini 'Homo Sapienne'-imi arnaqatiminoortartut marluk, anguteqatiminoortartoq ataaseq, arnanik angutinillu atoqateqartartoq ataaseq transseksuelilu ataaseq oqaluttuarai, pineqarpullu asanninneq, ikinngutigiinneq ilaqutariinnerlu.
– 'Homo sapienne' suiaaneq asanninnerlu pillugit atuakkiaavoq. Allaanerussuteqarneq pingaarnerutillugu, tamannali soqutaavallaanngilaq, misigissutsimmi taakkuuginnarput. Atuakkiortoq sammineqarsimavoq oqaatsimik 'pølsi', pølsi pinnagu, atuinera pissutigalugu, tamatumali saniatigut 'Homo sapienne' atuakkiaavoq qanilaartoq, qiimanartortalik pitaajuitsorlu, Politiken allappoq.
Politikens Litteraturpris 2014-imik nersornaaserneqartussaq februaarip 22-anni tamanut saqqummiunneqassaaq.