kulturimik nittarsaaneq
Homo Sapienne-mik atuakkiortoq nuimasuut akornanni
Nunat tamalaat atuakkiortunik festivalertitsineranni Niviaq Korneliussen atuakkiaqqaaminik ´Homo Sapienne´-mik oqaluttuaqqullugu qaaqquneqarpoq
Nunat tamalaat atuakkiortunik festivalertitsisarnerat tusaamaneqarluartoq ´Louisiana Literature´, aggustip 20-anniit 23-annut eqqumiitsulianik katersugaasivimmi Louisianami ingerlanneqassaaq.
Niviaq Korneliussen atuakkiaminik saqqummersitsinerminut atatillugu arlalitsigut nersorniarneqartarsimavoq.
Siusinnerusukkut Bogforums-ip atuakkiorlaamut nersornaasiuttagaanik nersornaaserneqartussatut aammalu Nordisk Rådip atuakkiortumut nersornaasiuttagaanik nersornaasigassatut inassutigineqareersimavoq.
Nipi nutaaq
Festivalimi Niviaq Korneliussenip saqqummiusseeqatigissavai qallunaat atuakkiortut tusaamasat soorlu Carsten Jensen, Suzanne Brøgger aamma Jens Christian Grøndahl, Niviaq Korneliussenilu qallunaat atuakkiortut inuusuttut atuakkioriaatsimi pingaarutilimmik nutaaliortut ilaattut aamma taaneqarpoq:
– 24-nik ukiullip Niviaq Korneliussenip atuakkiaqqaani ´Homo Sapienne´ ukioq saqqummersimmagu taanna alutorineqarlurapoq. Nuummi inuusuttunik tallimanik, inuunerisa allanngulernerannik oqaluttuaq sakkortooq imaqarluartorlu. Misigissutsitik tamaasa atorlugit imminnut nassaariniarput, atoqatigiinnikkullu suiaassusersiorlutik. Siulittuutigineqarpoq atuakkiortoq qallunaatut atuakkioriaatsimi nutaami malunnaatillit ilagillualissagaat, atuakkiortunik festivalertitsinissap programmiani allassimavoq,