silaannaap allanngornera
Hollandimiut filmiliortartut tv-kkut aallakaatitassiami peqataasussarsiortut
Juunip qaammataani hollandimiut filmiliortartut Nunatsinni rejseprogrammilioriartorlutik tikissapput. Taakku aallakaatitassiami peqataarusuttunik ujaarlerput.
Nunatsinni silaannaap allanngornera nunanit allanit soqutigineqarpoq.
Hollandimiut filmiliortartut juunip qaammataani Nunatsinnukassapput. Taakku Nunatsinni najugaqartunik rejseprogramimi peqataarusuttunik ujaarlerput.
- Kangerlussuarmiissaagut, Nuummi, Ilulissani nunaqarfimmilu Akunnaami. Kalaallit Nunaanni pissutsit pillugit politikerimik oqaloqarusuppugut, aammalu pisarneq malillugu inuuriaaseqartunik oqaloqateqarusulluta, Marloes Beens hollandimiut filmiliortartuat 3 op Reis-meersoq oqarpoq.
Nunaqavissunik ujaarlertut
- Nunat assigiinngitsut 139-it rejseprogammiliorfigalugit angalasimavugut, taakkuli Hollandimi aallakaatitassiarineqartarlutik. Kalaallit Nunaanni silaannaap allanngornera pillugu atugassaritaasut paasisaqarfigissallugit soqutiginnippugut, Marloes Beens ukiut arfineq pingasut matuma siorna Ittoqqortoormiiniissimasut oqarpoq.
Filmiliortartut Hollandimiut ulloq 6 juni Kangerlussuarmut tikissapput. Nuummiissallutillu juunip 8-niik 9-at tikillugu. Tamatuma kingorna filmiliortartut Akunnaamut Ilulissanullu ingerlaqqissapput.
- Akunnaamiinnitsinni najugaqartut inuunerat misigisaqarfigerusupparput. Ilulissaniinnitsinnilu qimussertartumik silaanaap allannguutaanik misigisaqarsimasumik oqaloqateqarusulluta, Marloes Beens oqarpoq.
Rejseprogrammimi peqataarusuttumik nalunngisaqaruit Marloes Beens uani mailerfigalugu attaveqarfigisinnaavat.