Høegh-Dam: Inuttut malersorneqarpugut
Nuliariit Bitten aamma Kim Høegh-Dam ingerlatseqatigiiffimmi Iluliaq Seafood A/S-imi piginnittut, ippassaq ataasinngornermi naatsorsuutit pillugit allaaserisaq tunngavigalugu Sermitsiaq.AG inuttut malersuinerarpaa.
Allaaserisami allassimavoq, Bitten Høegh-Dam 2017-imi 457.775 koruuninik isertitaqarsimasoq.
Kim Høegh-Dam Facebookimi gruppi “Politikkikkut oqalliffik” aqqutigalugu allappoq,
Bitten Høegh-Dam akissarsitinneqarsimanngitsoq
- Ukioq tamaat isigalugu agguaqatigiisillugu aningaasarsiat pineqarput. Uagutsinnullu atatillugu ataatsimik sulisoqarsimasutut isikkoqarpoq naak 20-t sinnerlugit piffissap ilaani sulisoqarsimangaluarluta, Kim Høegh-Dam allappoq.
- Nittarsaanneqarpugut
Kim Høegh-Dam aamma erseqqissaavoq:
- Taamatut Sermitsiami nittarsaanneqarnerput inuttut malersuinertut taamaallaat oqaatigineqarsinnaavoq, taanna Facebookimi allappoq.
Ilanngullugu paasissutissiarineqarpoq, “suliaq Kalaallit Nunaanni politiivinut tunniunneqarsimasoq aammalu Kalaallit Nunaanni Tusagassiuutit pillugit Aaliangiisartunut tunniunneqarniartoq”.
Kim Høegh-Dam marlunngormat Sermitsiaq.AG-mit ppissarsiariniarneqaraluarpoq. Ataasinngornerullu unnukkuani aappariit aaqqissuisoqarfimmit oqaloqatigineqarput, kukkuluttortoqarsimaneranillu aaqqiissuteqarsinnaaneranik suli iluatsitsisoqanngitsoq, oqaloqatigiinneq kipitinneqarpoq.
Naatsorsuutini kisitsit
Iluliaq Seafood A/S kukkunersiornertaqanngitsumik naatsorsuutaasa kisitsisaat ima isikkoqarput ungaluummiittullu 2016-minngaanneerlutik:
Ingerlatsinermut angusat: - 1.426.380 kr. (-352.580 kr.)
Ukiumut angusat: - 1.484.656 kr. (-406.106 kr)
Sanaartukkat pigisat: 9.099.000 kr. –(4.345.205 kr)
Pigisat: 9.773.031 kr. (5.027.755 kr)
Nammineq aningaasaatit: - 1.717.393 kr. (-232.737 kr.)
Akiitsut: 11.490.424 kr. (5.260.492 kr)
Akiligassat: 9.773.031 kr –(5.027.755 kr)
Ukiumut naatsorsuut tamarmiusoq uani atuarneqarsinnaavoq: Iluliaq Seafood A/S