Arctic Winter Games
Hockeymi atortut Kangerlussuarmi tammartut
Hockey-rtartut Alaskameersut arfininngormat Iqalunnut tikilluarput. Atortutilli nassarnagit
Kukkunikkut atortut ilarpassui Kangerlussuarmi Mittarfimmut qimanneqarsimapput, timmisartup attartukkap Air North-imeersup alaskamiut hockeymik unammisartut Kangerlussuarmit Iqalunnut timmisartuummagit.
Taamatut paasissutissiivoq mittarfiup pisortaa Rita Müller. Mittarfeqarfiit atortut maanna nassaarisimavai, nassatassanut allanut Nuummukartussanut akulerutsinneqarsimammata. Tamatuma saniatiguty hockeymi anaalerutit tamarmik Danish Airforcemut inissinneqarsimapput, sisorarnermi atortunik allanillu Nuummut timmisartuussisussamut.
Kukkusumik meqqilerneqarsimapput
Kukkunermut pissutaavoq atortut pisarnermit allaanerusumik meqqilerneqarsimanerat, taamaasilluni kuffertip meqqiata tunuani allassimalluni Iqalunnukaassassaasut, Rita Müller paasissutissiivoq.
Kuffertit nassaarineqarput
Aamma aallartitat pingasut Iqalunnut pisimapput kuffertii ilaatinneqanngitsut, taakkuli nassaarineqarput, taanna oqarpoq.
Nassiunneqassapput
Hockeymi atortut nassaareqqinneqarsimasut ullumi kingusinnerusukkut Iqalunnut nassiunneqassapput timmisartumik attartukkamik First Airimeersumik, taanna ullumi timersortartunik Northwest Territoriesimeersunik timmisartuussilluni Kangerlussuarmut tikissammat.