Hinnarik Meeqqallu juullerpaluttumik cd-mik saqqummersitsipput

Decemberiuvoq juullilerlunilu! Angerlarsimaffinni sumi tamani ullorissat takussaapput, aqqusernit juullerpaluttunik pinnersarneqarsimapput pisiniarfinnullu iseraanni juullisunnitsunik kaageersunnialaaq, uhmm! Maannalu meeqqat minnerunngitsumillu inersimasut qiimasut erinarsoqataasinnaanngorput, tassami Hinnarik Meeqqallu ilaqutariinnut tamanut naleqquttumik juullerpaluttumik cd-mik saqqummersitsimmata.

Erinnat quliupput, soorlu ’Qalianiippoq nissimaaq’ aamma ’Nissimaap nulia’. Hinnariup nipaa ilisarnartoq erinnallu pinnguarpalullutillu qiimanartut kikkut tamaasa erinarsorusuttut erinarsoqataanissaannut periarfissippai. Hinnarimmi amama nammineq juullisiortarpoq.

- Juulli tamanut ataasiuvoq. Sumiikkaluaraanni, kisimiikkaluaraanni qanigisalluunnit ataatsimooqatigigaluaraanni juulli tamanut assigippoq, Hinnarik nuannaarluni oqaluttuarpoq.

12-nik ukiullip Nuumminngaanneersup Heidinnguaq Jensenip taalliaa erinniaalu maqaasinermut tunngasoq ’Marluulluta’ aamma ilanngunneqarsimavoq, taanna peqatigalugu immiussisimapput. Heidinnguaq Jensenip 11-iinnarnik ukioqarluni taanna allatarisimavaa.

Erinarsuutit ilisarnartut Heidinnguaq Jensenillu erinniaa taalliaalu eqqaassanngikkaanni Angajo Lennert-Sandgreenip taalliaralugillu erinniai pingasut aamma ilanngunneqarsimapput. Erinarsuut ataaseq, tassalu ’Sumiluunnit juulli ataasiuvoq’ Disneyip titartakkanik filmiliaanut eqqaanarsinnaavoq. Aamma Miki ammartakkami ’Tammartagaq’-miittoq pulaartorineqarsimavoq.