tusarnaartitseqattaarneq
Hinnarik inuuissiornermini angalaarpoq
Quiasaarisartoq erinarsortartorlu Hinnarik meeqqanit inersimasunillu ilisimaneqarluartoq akunnaalliivoq
Maanna ukiut qulit qaangiupput filmi ’Hinnarik sinnattunilu’p saqqummerneraniit. Taanna aallarniutaavoq Hinnariup pisorpassuarni aliikkusersuisarneranut. Maanna Nanortalimmi aliikkusersuerngaarsimalerpoq.
Angajo Lennert-Sandgreen pingaarnertut Hinnarittut inuttaajutigaluni filmimi 2009-mi takuteqqaarneqartumi ilitsersuisuuvoq Hinnarittullu taaguuteqarluni aliikkusersuisarnera 2004-mi aallartippoq. Ukiunik qulinngortorsiorneq malunnartinniarlugu illoqarfinni qulini aliikkusersuiniarput taakkulu sapaatip akunnerat kingulleq Nanortalimmi aallarnerneqarmata nipilersortartoq Frederik Elsner peqataavoq
- Uanga nammineq Nanortalimminngaanneersuuvunga Hinnarillu tassaniissimanngisaannarpoq. Pingasunngormat nipilersornitsinni assut ilassilluarneqarpugut, Frederik Elsner Sermitsiaq.AG-mut oqarpoq.
Tullianik appisimaarnissaat Atlantic Musicip Nuummi pisiniarfiani pissaaq tallimanngorpat nalunaaqutaq 17.00. Tassani malunnartinniarneqassaaq kiateeqqat Hinnarimmik ilisarnaatillit tuniniaagaalernissaat.
Tulliullugu Sisimiuni juunip aallaqqaataani kulturip illorsuani Taseralimmi appisimaassapput meeqqat ulluat Hinnariullu ukiunik qulinngortorsiornera malunnartinniarlugit.
- Tusarnaartitsinivut meeqqanut inersimasunullu sammisitaapput. Filmip ’Hinnarik sinnattunilu’ erinartaasa ilaat Ulf Fleischerip aamma Zikazakkut atugaannersut atortarumaarpagut, Frederik Elsner oqarpoq.
Hinnarik aamma Frederik Elsner illoqarfinni allani appisimaarnissaminnut maanna pilersaarusiorput. Pilersaarutaavoq illoqarfiit qulit appisimaarfigineqassasut.