22. 01. 2017
  • Dansk
  • Kalaallisut
Tuesday, January 10, 2017 - 13:14

Hiistertarfimmut pilersaarutit takukkit

Hiistertarfik Qinngutsinni inissisimassaaq
Assi.: Leiff Josefsen
Hiistertarfiliornermik suliniut iluatsissappat, Nuup killingani hiistit 28-t ivikkanik mangiartalissapput

Qinngutsinni narsaamanermi Nuummi Atuarfik Hans Lyngep avannaata kangiani pilersaarutaasoq illuaraqarlunilu, nersutaasiveqarlunilu hiistertarfeqarpoq.

Kommuneqarfik Sermersuumi Sanarfinermut Avatangiisinut Ingerlatsiviup suliniummut qinnuteqaammik pissarsiarisimasaani, ullumikkut ataatsimiititamit suliarineqartumi atuarneqarsinnaavoq.

Atuaruk: Feeriartitsisarnermut nersornaat akimasoq

- Takornariaqarnermut suliniuteqarnissaq, hiistertarfimmik immikkut ittumik ingerlatsiffiusumik, sunngiffimmi hiistertarfimmik, unnuinertalimmik hiistertarfimmik aamma hiistertarfiup nersutaasiviani allanik sammisassaqartitsiniutinik ingerlatsisarnissaq isummersuutaavoq, ataatsimiinnermi oqaluuserisassami oqaatigineqarpoq.

Nersutaasivik inissaqarluartoq
Nersutaasivik pilersaarutaasoq hiistinik 28-nik inissaqassaaq. Pilersaarusiortut hiistit pingasut aallarniutiginissaat pilersaarutigaat, siulliillu sungiusseriarpata amerlanernik tikisitsissallutik. 

Pilersaarummut qinnuteqartup hiistertarfiliornissamut pilersaarut VISKA, horses & roomsimik taaguuteqartippaa, aqutsisoqarfillu illoqarfimmi suliniummut nutaamut akuersaarput.

Atuaruk: Takornariat amerliartuinnartut Nuuk toqqartarpaat

- Pilersaarut VISKA takornarissanik nutaanik ornigutsitsisinnaassaaq, immaqalu aamma takornarissanik misigisassarsiortunik ornigutsitsisinnaassalluni. Tamatuma saniatigut hiistertarfimmik pilersitsinissamut isuma pissanganartuuvoq, sunngiffimmi sammisassaq nutaajussaaq, Qinngutsinni najugaqarfimmik Nuummullu sinneranut nukittorsaataassalluni, oqaluuserisassani nassuiaatigineqarpoq.

Pilersaarummi aamma aasaanerani ivigartortitsisarnissamut, aasaanerani ungalusat nuunneqarsinnaasunut ukiorlu tamaat atorneqarsinnaasunut nunaminertat ilaatinneqarput. 

Illuaqqat sisamat initallit, café, garage, nersutaasivik aamma hiistertarfik pilersaarutaapput. 

Hiisterfiit assigiinngitsut pingasut
Qinnuteqartup aamma Nuup eqqaani pinngortitaq hiisterfittut qanoq atorneqarsinnaanersoq nassuiarpaa.

Pilersaarusiortut hiistertitsisarnissat assigiinngiaartut ingerlanniarlugit takorloorpaat. Qallussuaq saneqqullugu aqquteqarsinnaavoq, tamanna qinnuteqaammi atuarneqarsinnaavoq.

Aqqutip aappaa parnaarussiviup eqqaatiguussaaq Kuannguit tungaannut ingerlaqqittoqarsinnaalluni. Aqqutit pingajussaa tassaassaaq Ukkusissat kujaqqullugu Kangerluarsunnguup tungaanoortoq hiistertarfiusussaaq, tassa Siorarsiorfimmut attaveqaat pilersinneqariarpat. 

Iliveqarfimmut aamma inissaqartoq
Hiistertarfiup sumiiffiup atornissaanut qinnuteqaatigisaata ilaa iliveqarfiliorfissaatinneqareerpoq. Kisianni tamanna ajoqutaanavianngilaq.

- Tamanna piviusunngortippat/piviusunngortinneqassappalluunniit pilersinneqarsinnaasutut nalilerneqarpoq, tassa immikkoortoq ima angitigaaq allaat aasami ivigartortarfimmut inissaqarlunilu siunissami iliveqarfeqalernissaanut, tassungalu atortussaanut, atorneqarsinnaassalluni, Sanarfinermut Avatangiisinut Ingerlatsivik naqissusiivoq.

Suliniut kommunip ataatsimiititaliaanit akuerineqassappat, kingornalu kommunalbestyrelsimit, qinnuteqartup nammineq sanaartorfigiuminarsaaneq, sanaartorneq atortullu allat nammineq aningaasalersussavai.

Seneste nyheder