nalliuttorsiorneq
Hestimik takutitsineq grillereqatigiinnerlu
Savaateqarfik Qassiarsuk ukiuni 90-nngortorsiorluni nalliuttorsiorpoq. Annertuumik sulinikkut savaateqarfik ineriartorpoq
Savaateqarfiup Qassiarsup ukiuni 90-ni nalliuttorsiutigineqarnera malunnartinneqarluarpoq.
Ullaakkut nalunaaqutaq arfineq pingasunut erfalasoq amuneqarpoq tamanullu ullaakkorsiortitsisoqarluni.
Ajoqi Sofiannguaq Frederiksen naalagiartitsivoq Vilhelm Lyngep erinarsoqatigiivi erinarsorlutik. Naalagiaqatigiittoqareermat eqqaaniaasoqarpoq.
Tassanngaannit kaffillertoqarpoq, hestinik takutitsisoqarluni, qajariartoqarluni unnukkullu grillereqatigiittoqarluni.
Qassiarsuk ineriartortoq
Erfalasup amuneqarnerani nunaqarfiit sinniisaasa siulittaasuat Igalikumeersoq Mouritz Karlsen oqalugiarpoq. Qassiarsuup ineriartornera oqaluttuaraa. Savaateqarnikkut ineriartortoqarpoq sukataarluni sulinikkut, sulilu siunissami ataavartussatut naatsorsuutigineqarluni.
Aalisarnermut, piniarnermut nunalerinermullu naalakkersuisoq Finn Karlsen peroriartorfini pillugu oqaluttuarpoq. Savaatilittut ilinniartunngorsimagaluarnini oqaluttuaraa, allaffimmiusut niuernermullu atuartussatulli siunnersorneqarsimanini aamma oqaluttuaralugu. Siunnersorneqarpoq taamani savaateqarneq siunissaqanngitsutut oqaatigineqarmat.
Sissami hestinik takutitsisoqarpoq, sukkaniunnermilu Henrik Frederiksen ajugaavoq, Suulut Frederiksen Qinnguaneersoq aapaattut inissippoq, Sofus Frederiksen Narsap Iluaneersoq pingajuattut inissilluni.
Qajartortartut Qaqortumeersut pingasut qajarnermik takutitsipput, naggataatigut grilleqatigiittoqarluni. Amôraq Egede aamma Benjamin Kielsen aliikkusersuipput.
Assit ataani takukkit