Hermann: RG-ip allaffeqarfissua Ålborgimiittoq nunatsinnut nuunneqarli

Hermann Berthelsen (S) naapertorlugu Ålborgimi sulisout 200-t missaanniittut ilaasa nunatsinnut nuunneqarunik iluaqutaassasoq

- RG-ip Ålborgimi immikkoortoqarfia nunatsinnut nuunneqarpat, namminiilivinnissatsinnut sungiusarluta piareersarlutalu aallarteriissagaluarpugut.

Qeqqata Kommuniani borgmesteriusimasoq, Herman Berthelsen, maanna Inatsisartunut qinigassanngortittoq, qineqqusaarummini taama allappoq. Ullumi Royal Greenlandip ukiumut naatsorsuutimini akileraarutit ilanngaatigereerlugit 253 million koruuninik sinneqartoornini takutippaa.

Ajornassanngitsoq

Nunattali suliffeqarfimmik piginneqataanera qularnaarneqassappat Danmarkimi immikkoortoqarfik utertinneqartariaqartoq, Hermann Berthelsenip oqaatigaa.

- Tamatta suliffeqarfissuartut pigisarput RG qujanartumik ingerlalluarpoq, tamatsinnut iluaqutaalluartumik. Nunatsinnullu nuunneqaruni ingerlalluaannarnissaa aamma qularutiginngilara.

- Aamma isumaqarpunga Naalakkersuisunut siulittaasunngortussaq tulliani RG ataatsimeersualerpat tamakkuninnga oqariartuuteqassasoq minnerunngitsumik aalisakkanut akit assigiinnerusumik ingerlanneqartariaqartut nunatta suatungaaniikkaluaruttaluunniit. Soorluli tamakku ajornassanngitsut suliffeqarfiimmi taamaattut kalaallinit 100 procentimik pigineqartut aalajangiiffigineqassallutillu, Hermann Berthelsen oqarpoq.

Powered by Labrador CMS