Naatsorsueqqissartarfik
Henrik Leth taamaammat soraarsitaavoq
Henrik Lethip Naatsorsueqqissaartarfimmi siulersuisunut ilaasortatut soraarsitaanera akerleriiffiulluni tupaallannartoq, kattuffimmut Sulisitsisunut attuumassuteqarneranik pissuteqarpoq.
KNR naapertorlugu naalakkersuisumit Aqqaluaq B. Egedemit nassuiaat taama nipeqarpoq.
Inatsisip tunngavianut innersuussisoq
Aqqaluaq B. Egede ilaatigut Naatsorsueqqissaartarfiup inatsisitigut tunngavianut innersuussivoq, ima allaqqasumut:
- Naatsorsueqqissaartarfimmi siulersuisuni ilaasortat inuttut piginnaasai aallaavigalugit qinerneqartassapput, taakkualu oqartussaasunut kattuffinnillu aalajangersimasunut sinniisuunngitsut.
Taamatut oqariartuuteqarluni Aqqaluaq B. Egede KNR-mut ilisimatitsivoq, Henrik Leth siulersuisuni ilaasortaanera unioqqutitsinerusoq, kattuffimmi ilaasortaanera pissutaalluni.
Ukiuni arfineq-marlunni siulersuisuni ilaasortaasoq
Aviisip AG-p soraarsitsinermut nutaarsiassaq saqqummiukkamiuk ilisimatitsivoq, Henrik Leth økonomitut kisitsisit atorlugit nassuiaasiornermi sammisaqarluni ilinniarsimasoq ilisimatitsissutigaa. Taanna ukiuni arfineq-marlunni siulersuisuni ilaasortaavoq.
Henrik Lethip taartaa tassaavoq Tønnes Berthelsen, taanna kattuffimmi KNAPK-mi qinikkatuunngitsoq sulisuuvoq, tassani pisortaagallarpoq. Ilinniarnikkut tunuliaqutigaa Københavnimi cand.merc aamma Leedsimi universitetimi MBA.
Qinikkatut imaluunniit sulisutut siulersuisuni ilaasortatut issiasinnaanermut apeqqut pingaartinneqarpasippoq. Tamanna Namminersorlutik Oqartussat ukiuni arfineq-marlunni Henrik Lethip ilaasortaanerani maluginiarsimanngilaat.
Aqqaluaq B. Egede oqaaseqarumanngitsoq
Aqqaluaq B. Egedemut arlaleriarluni attaveqarniartaraluarnermi Sermitsiaq.AG-p oqaloqatiginissaa iluatsissimanngilaa.
Henrik Lethip soraarsitsinermut nassuiaat oqaaseqarfigerusussimanngilaa, Naatsorsueqqissaartarfimmi siulersuisunut siulittaasup Vøgg Løwe Nielsenip tamanna apeqqusersimavaa ''maanaannakkut siulersuisunut ilaasortanik soraarsitsineq maleruagassat iluaniinnersoq'', aviisimi AG-mi tamanna oqaatigineqarpoq.