Henrik Leth Michael Binzerilu Avalammut pulaartut

Sulisitsisut Peqatigiiffiata GA-p siulittaasuata Henrik Lethip kalaallit Danmarkimi ilinniagaqartut Københavnimi Aalborgimilu pulaarpai.

Tamatumuunali Henrik Leth Polar Seafoodimi siulersuisunut siulittaasutut tikeraarpoq, sammisaq tassaammat aalisarnerup Kalaallit Nunaanni inuiaqatigiinnut pingaarutilerujussuunera. Sammisaq tamanna ullumikkorpiaq pingaaruteqarpoq Kalaallit Nunaanni aatsitassarsiornikkut suliniutit qaqugu aallartinnissaat nalornissutigineqalermat.

Københavnimi aaqqissuussisoqarmat tamanna misilitsinnissamut pisariusumut piareersaleruttorfimmi pivoq, taamaattumillu ilinniartut amerlanersaat piareersarlutik, taamaattorli Henrik Lethip saqqummiussineranut arlallit takkupput, apererusuttullu imaaginnavillutik.

Marlunngornermi aamma Aalborgimiippoq, tamatumanilu Henrik Leth Polar Seafoodimi siulittaasup tullianit Michael Binzerimit ingiaqatigineqarluni.

- Inuusuttunut Danmarkimi ingerlariaqqiffiusumik ilinniagaqartunut attaveqarnermik pitsaasumik pilersitsineq aallussinerlu Kalaallit Nunaanni inuussutissarsiutinik ingerlatsisunut pingaartuuvoq, Henrik Leth oqarpoq.

- Ilaatigut taamaaliorsinnaavugut inuussutissarsiornerup ineriartornera pillugu Kalaallit Nunaannilu suliffissanut periarfissat paasititsiniaasarnertigut. Pisortat ingerlatsineranni suliffeqarfinnilu ilinniarluarsimasunik pisariaqartitsisorujussuuvugut, taamaattumi ilinnianerup naammassinerata kingorna sapinngisamik amerlanerpaat angerlamut uternissamut kajumilersissinnaagutsigik aalajangiisuulluinnassaaq. Tamanna ataatsimut akisussaaffiuvoq, qujanartumilli ilinniartut tungaannit soqutiginninnerup annertusiartornera malugisinnaavarput. Suliami tamatumani Avalak aallaavittut uatsinnullu suleqatitut pitsaasutut nalilerujussuuvoq. Ilinniartunik naapitsineq Kalaallit Nunaatalu siunissaa pillugu sunik eqqarsaateqarnerat tusarlugu uatsinnut aamma isumassarsinartuuvoq, Henrik Leth erseqqissaavoq.

Avalak - Danmarkimi Kalaallit Ilinniagaqartut Kattuffigaat. Suna tamarmi 1963-imi “Unge Grønlænderes Råd” i 1963 aqqutigalugu aallartippoq, suleriaaserlu taamaattumik ukiut ingerlaneranni allanngoriartorsimalluni. Avalak ilinniagaqartut kattuffiattut ingerlalluartutut ataqqisaasutullu ilaatigut Namminersorlutik Oqartussanut allanullu attaveqaataasutut ineriartorsimavoq.