Trist

Henrik Broberg sapaatiummat ullaakkut toquvoq

Qaammatini arfineq-pingasuni kræftimut akiuutereerluni Henrik Arkalo Broberg sapaatiummat ullaakkut toquvoq. Danmarkimi ilineqassaaq

Henrik Broberg 42-nik ukioqarluni sapaatiummat ullaakkut toquvoq qaratsamigut kræfterluni.

– Qujanaq asanninnermut tapersersuinermullu, inuit uagutsinnut takutissimasaannut. Tamanna uagutsinnut ilaqutaasunut, minnerunngitsumillu Henrimmut pingaaruteqarsimaqaaq.
Taamatut Sermitsiaq.AG-mut oqarpoq Thora Broberg, Henrik Arkalo Brobergip nulia. Henrik sapaatiummat ullaakkut napparsimmavimmi toqujartortarfimmi Søndergaardimi, Måløv-imiittumi, ilaquttami najoraanni anerningerpoq.
Toqunissaa utaqqineqarsimavoq ilaqutaasullu nalunngilaat. Henrik Broberg 2013-imi aggustimi kemo-mik katsorsartinnini unitsippaa pingasoriarluni qaratsimigut pilatsereerluni, 30-eriarluni qinngornernik katsorsartittareerluni aammalu iisartakkanik kemo-mik katsorsartereerluni. Kemo-mik katsorsarneratigut inuunera sivitsorneqassaaq, akerlianilli inuunerata pitsaassusia ajorseriartissallugu.
Ilaqutaasut ammasumik saqqummerniarlutik aalajangersimapput nappaatillu ingerlarnga Kræftens Bekæmpelse-p nittartagaani, Sermitsiaq.AG-mi aappariillu ataatsimut Facebook-imi qupperneranni oqaluttuaralugu. Napparsimanerata tamanut saqqummiunneqarnerata kingorna ilaqutaasunut tapersersuilluni aningaasanik katersuiniartoqarpoq, ilaqutariit aningaasanik ermunassuteqaqqunagit, tassa Kalaallit Nunaanni najugaqarluni ilaqutaasup Danmarkimi napparsimmavimmi toqujartortarfimmiinnerani najornera akisuujummat.
Aamma atuaruk: Henrik kræftimik toqquteqassaaq. Ilaqutariit oqaluttuaat killitsinnartoq
Thora Brobergip Sermitsiaq.AG-mut oqaatigaa Henrik Danmarkimi ilineqarallassasoq, tamatumalu kingorna qatanngutaata arnap arsaa Nuummukaatissavaa, tassani ilineqassalluni.
Ilanngullugu oqaatigaa ilisigallarnissamut kikkut tamarmik tikilluaqquneqartut, tamassumali qaqugu pinissaa suli ilisimaneqanngitsoq.

Powered by Labrador CMS