ukiumoortumik naatsorsuutit

Heca angusarissaartoq

Neriniartarfiutillit imerniartarfiutillillu Heca, ilaatigut nunatsinni immiorfiit annersaannik Godthåb Bryghusimik piginnittut, 400 procentimik siuariarlutik 2016 anigorpaat

Nicolai Nissen, adm. direktør, Godthåb Bryghus
Aana Heca A/S-ip pisortaa Nicolai J. Nissen

Ukioq 2016 Heca A/S-imut ilaatigut tunisassiorfimmik Gothåb Bryghusimik kiisalu Nuumi neriniartarfinnik arlalinnik ingerlatsisumut angusarissaarfiuvoq.

Ukioq 3,2 million kr-nik suliffeqarfimmut angusaqarfiuvoq, taakkunanngalu akileraarutinik akiliinissaq sioqqullugu 2,8 million kr-it angusarineqarlutik.

Hecap kaaviiaartitanik sisamaariaat sinnerlugu annertusigai oqaatigineqarpoq.

- Immiaaraq pitsaasoq kisiat nioqqutiginngilarput. Suliffeqarfiuvugut aliikkusiartitsinermik ingerlatsisoq, kalaallillu pingaartitaannik anersaavannillu ataqqinnittoq, periarfissanik nutaanik ineriartortitsisoq, periutsinik ineriartortitsisoq qaffasissumillu pitsaassusilimmik oqaluttuarnermi ingerlatsisoq, pisortaq Nicolai J. Nissen tusagassiorfinnut nalunaarummini allappoq.

Immiaaqqanik avammut tuniniaaneq
2016-imi piffinni nipilersortarfini nipilersullammaat ineriartortinnerannut annertuumik aningaasaliisoqarpoq. Ukiup ingerlanerani nipilersortartunik isiginnaartitsisartunillu maanimiunik tusarnaartitsinernik isiginnaartitsinernillu 200-nit amerlanerusunik HECA A/S ingerlataqarpoq. Suliffeqarfiullu taamatut periuseqarnini 2017-imi nangissavaa.

Immiorfeeqqallu illoqarfimmi tuniniaanini kisiat siuariarfiginngilaa.

Godthåb Bryghusip immiaaqqanik avammut nioqquteqarnini aallartippaa, taamaalillunilu qallunaat immiaaqqap Nuummeersup mamarsaatigilluarnissaanut periarfissaqalerput.

- Suliniuterpullu nangillugu avammut niuernermik isumaginnittumik atorfinitsitsivugut, taamaalillutalu nunani arlalinni siaruarterisunik, hotelinik neriniartarfinnillu isumaqatiginninniarnernik pissanganartunik ingerlatsillutalu isumaqatigiissuteqarluta. Peqatigisaanillu suliffeqarfik Kinami Shanghai-imi annikitsutut ingerlatamik pilersitsiartuaarnermik aallussivoq. Tamanna ilaatigut inuussutissarsiornermik ineriartortitseqatigiiffik Business Greenland tapersersortigalugu ingerlanneqartoq, tusagassiutinut nalunaarummi allassimavoq.

Heca Nuuk A/S, ineriartortitsinermik avammullu niuernermik ingerlatsisuni piffissap sivikitsup ingerlanerani nakuartanngortoq, niuertumit pikkorissumit Nicolaj J Nissenimit ingerlanneqarpoq, taassumalu aamma Heca Nuuk A/S-mi piginneqataassutit amerlanersaat, nittarsaassinermik, siunnersuinermik aningaasaliisarnermillu suliffeqarfik Public Demand Agency Grønland aqqutigalugu pigai.

Powered by Labrador CMS