Hebdop saqqummiussassaa pillugu Parisimi atuartoq: Malinnaaffigineqartorujussuussaaq

Aviisi Charlie Hebdo peqqarniisaarnianit saassunneqareernermi kingorna aviisi saqqummissaaq pingasunngorpat. Aviisi nalinginnaasumik 60.000-nngorlugu naqinneqartaraluartoq 3 millioninngorluni pingasunngorpat naqiterneqassaaq.

- Peqqarniisaarniat Charlie Hebdomut saassussereernerisa kingorna aviisip saqqummeqqinnissaa nukissamik tunisissasoq isumaqarpunga. Killilersugaanngitsumik oqaaseqarsinnaaneq aallaavigalugu quiasaarusianik titartaasarnerit aamma ingerlatiinnarneqarnissaat siunissamilu ineriartorteqqinneqarnissaat ilimanarpoq, Issittumi pissutsit pillugit Frankrigimi ilinniagaqartoq Nina-Vivi Andersen oqarpoq.

- 3 millioninngorlugu saqqummersinneqarnissaa annertuumik malinnaaffigineqarumaarpoq, oqarpoq.

Nina-Vivi Møller Andersenip Parisimi pisut qanimut misigisaqarfigai. Parisimi akerliussutsimik takutitsisoqarnerani sapaatiummat peqataavoq, tassani ilaatigut nunarsuarmi pissaanillit aamma peqataapput.

Killilersugaanngitsumik oqaaseqarsinnaaneq
- Akerliussutsimik takutitsinermi peqataaneq soorlu tassa ilisinermi peqataalluni. Eqqissiallannarpoq, taamaasilluni ulluinnarni sulianut uteqqissinnaanngorpugut, Nina-Vivi Andersen oqarpoq. Parisimit 30 kilomerinik ungasitsigisumi Saint Quentin en Yvelinesimi ilinniartuuvoq.

- Aviisi Charlie Hebdo killilersugaanngitsumik oqaaseqarsinnaanerup ilisarnaatigilissannguatsiarpaa. Frankrigimi pisut innuttaasunit nakkassutigineqarnavianngillat. Præsidenti Hollande ilaatigut ima oqarpoq: 'Arlaannik iliuuseqannginnermit nikorfaannarusunneruvugut sapiissuserpullu takutillugu'. Frankrigimi innuttaasorpassuit taamaaliornissaat isumaqarpunga, Nina-Vivi Andersen Sermitsiaq.AG-mut oqarpoq.

Charlie Hebdo saqqummeqqippat piumaneqartorujussuusussaagunarpoq. Aviisi nalinginnaasumik 60.000-nngorlugu naqiterneqartaraluartoq tulliani 3 millioninngorlugu naqiterneqassaaq. Pingasunngornermili saqqummeruni 16-nik qupperneqartaraluarluni arfineq pingasunik qupperneqarluni saqqummissaaq.

Danmarkimi aviisinik agguaasartup aviisi 300-nngorlugu inniminniissutigereerpaa. Nunanut allanut tunngasunut aviisinik tuniniaasartunut taakku tuniniarneqassamaarput.

Kalaallit Nunaanni aviisit sapaatip akunneranut saqqummertartut Atuagagdliutit aamma Sermitsiaq Charlie Hebdop aviisiani saqqaritinneqartut saqqummiunneqassapput, tassani titartakkat quianartuliat assigiinngitsut soorlu Jiisusi, Muhammed aamma Moses saqqummiunneqassapput.

Parisimi peqqarniisaarniartoqarnerani inuit 17-t katillugit toqutaapput. Charlie Hebdomi sulisut aqqaneq marluk toqunneqartut.

Taakku saniatigut biilit angallannerannik nakkutiginnittoq ataaseq toqunneqarpoq kiisalu sallunaveequtitut tigusarineqartut sisamat aamma toqunneqarlutik.