Færøerne

Hashsag: Politikeri oqallisaasoq sulinngiffeqalertoq

Savalimmiuni lagtingimut ilaasortaq Bjarni Hammer hashimik suliami attuumassuteqartutut pasineqartoq, lagtingimit sulinngiffeqalerpoq.

Bjarni Hammer lagtingimit sulinngiffeqalernini pingasunngormat nalunaarutigaa. Sulinngiffeqarneq piffissami killingaanngitsumi pissaaq tassa politiit suliamik misissuinerisa nalaani. Lagmandspartii Javnaðarflokkurinip eqqissilluni sulinissaa pillugu taamaaliorpoq.

Nanertuunneqartoq

Politikeri niviarsiaqqamut hashimik pissarsiniussisinnaanera aviisimit Sosialurinimit allaaserisaqarnerata kingorna, Bjarni Hammer nanertuunneqalerpoq. Tusarfiit nutaarsiassaqartitsiviup attaveqarfii naapertorlugit, inuup allap hashimik pissarsisinnaanera politikerip oqaatigaa.

Lagmand Aksel V. Johannesen allaaserisap saqqummersinneqarnerata kinguninngua politikkikkut ingerlatsinermi pitsaaneraparaa aammalu Bjarni Hammerip nammineerluni sulinngiffeqassalluni aajangersimanera pitsaasuunerarlugu.

Bjarni Hammerip hashimik suliami politiinit killiorneqarsimanini uppernarsarsimavaa.

Tusagassiorfik isornartorsiorneqartoq

Oqaluttuarnerup kingorna Sosialurinip periusai annertuumik oqallisigineqangaatsiarpoq. Niviarsiaqqap inuussuttup Bjarni Hammerillu oqaloqatigiinnerat immiunneqarsimanersoq, allaaserisami allassimanngilaq.

Sosialurin sooq suliamik politiinut nalunaarutiginnittariaqarsimanera aammattaaq qularutigineqarpoq. Sosialurinip allaaserisami paasissutissiaraa, politiinut nalunaarutiginninnerup kingorna suliami qanoq pisoqassanersoq politiinut malinnaavigineqarsimasoq.

Piffissallu ingerlanerani, politiit suliami Bjarni Hammerimut – politiitut aamma atorfilik – kinguneqartitsinissaata tungaanut Sosialurin suliamik misissueqqinnginnissani aallaaserisaqaqqissananilu aalajangiussimavaa.

Qanippallaartoq

Kringvarp Føroyap Sosialurini suliami qanippallaalersimannginnera pillugu, aaqqissuisuuneq apeqquteqarfigisimavaa.

- Oqaatigisagut uppernarsarsinnaavagut. Naak suliami peqataangaluarluta malinnaavigisinnaanera upperinngilara. Immaqa allaniit pitsaanerusumik oqaluttuarsinnaavarput, peqataaffigingaatsiarnikuuarpummi piffissamilu sivisuumi misissungarisimallugu, aaqqissuisuuneq Barbara Holm Kringvarp Føroyamut oqarpoq.

Powered by Labrador CMS