aanngajaarniutit

Hashimut sakkortusaarnerulernissap tapernerneqarnera Demokraatit nuannaarutigaat

Ilaqutareeqarnermut oqaaseqartartup Tillie Martinussenip (D) ikiaroornartuerniartartunut, meeqqanut hashimik tuniniaasartunut, pinerluttulerinermut inatsiip sakkortusineqarnissaa ilungersuutigaa

Tillie Martinussen (D)

Naalakkersuisunut allakkatigut apeqquteqaatitigut arlalitsigut Demokraatit ilaqutareeqarnermut oqaaseqartartuata hashimik tuniniaasartut tatineqarnerulernissaat iliungersuutigaa. Tamatumani pineqarput hashimik meeqqanut tuniniaasartut.

København oqaloqatigalugu

Maanna Naalakkersuisut akissuteqarput ukiukitsunut hashimik tuniniaasarnerup sakkortuumik iliuuseqarfigineqarnissaa isumaqatigigitsik, sakkortunerusumilli pillaasarnissamut periarfissat qanoq ittuunersut maannangaaq ersarivinngitsoq.

Tamanna peqatigalugu Naalakkersuisut nalunaarput periarfissat misissorniarlugit, pisariaqassappallu Københavnimi Inatsisinik atortitsinermut Ministereqarfik, tamatumunnga akisussaaffilik, oqaloqatiginiarlugu.

– Naalakkersuisut tapersiinerat Demokraatit iluarisimaarluinnarpaat, suliallu ingerlanneqarnerata malinnaaffiginissaa qilanaaraarput, Tillie Martinussen naalakkersuisoqatigiit saqqummiussaannut qisuariaatitut tallimangormat oqarpoq.

– Ukiukitsunut hashimik tuniniaasartut sakkortuumik ingerlaannavillu pillarneqartassapput. Tuniliaqutaasut soqqusaatsut ussiataaralutik meeqqanik inuusuttunillu ajortup tungaanut saatitsisut, assersuutigalugulu pinngitsaaliinissamut, kinguaassiuutitigut atornerluinissamut inuunerlu tamaat aanngajaarniutinik atornerluinissamut ulorianartorsiortitsinerulersut, aningaasarpassuarnik iluanaarniarsinnaassanngillat.

Powered by Labrador CMS